ინიციატივა ,,ცესკოს“ წევრების საპენსიო დანამატზე კარგი საერთაშორისო პრაქტიკიდან გამომდინარეობს, - განაცხადა „ცესკოს“ პრეს სპიკერმა ანა მიქელაძემ „ჯი-ეიჩ-ენთან“ საუბარში.
მან საქართველოს ცენტრალური საარჩევნო კომისიის მიერ პარლამენტში წარდგენილ წინადადებაზე ისაუბრა. ინიციატივის მიხედვით, „ცესკოს“ წევრებს პენსიასთან ერთად უნდა დაენიშნოთ დანამატიც, რომელიც მოქმედი წევრის ხელფასის მესამედი იქნება, აღნიშნული წესის თანახმად, თანამდებობის მიხედვით შესაძლო დანამატები 383-დან 1833 ლარამდე იქნება.
„იგი ემსახურება საარჩევნო ადმინისტრაციის დამოუკიდებლობის გაზრდას და განმტკიცებას. დღეს იყო იურიდიულ კომიტეტში განხილვა და „ცესკოს“ მიერ იყო წარდგენილი საკანონმდებლო წინადადებები, იგი არ შეეხებოდა მხოლოდ ამ აღნიშნულ კანონში ცვლილებების შეტანას, წინადადებათა დიდი ნაწილი იყო ტექნიკური ხასიათის და ითვალისწინებდა საქართველოს საარჩევნო კოდექსსა და ნორმატიულ აქტებში ცვლილებების შეტანას. ყოველივე ეს ემსახურება საარჩევნო პროცესის გაუმჯობესებას. დღეს კომიტეტმა უკვე მიიღო შესაბამისი გადაწყვეტილება, მათ მოიწონეს და მხარი დაუჭირეს წარდგენილ წინადადებებს. რაც შეეხება იმას, მიიღებს თუ არა ეს ინიციატივა კანონპროექტის სახეს და მოხდება თუ არა მასში რაიმე სახის ცვლილებები, ამასთან დაკავშირებით პროცესი არის ღია, გამჭვირვალე და ნებისმიერი დაინტერესებული მხარისათვის ხელმისაწვდომი“,- განაცხადა „ცესკოს“ პრეს სპიკერმა „ჯი-ეიჩ-ენთან“ საუბრისას.
ანა მიქელაძის თქმით, ამ ეტაპზე რთული სათქმელია თუ რა თანხა დაიხარჯება სამომავლოდ საარჩევნო კომისიის წევრების საპენსიო დანამატზე, თუმცა აღნიშნა, რომ მიმღები ადამიანების რაოდენობა მცირერიცხოვანია.
„თანხაზე საუბარი ჯერ ნაადრევია, რადგან საკანონმდებლო ცვლილება შეეხება მხოლოდ პირს, რომელიც მიაღწევს 65 წელს, ან არანალკებ 25 წლიანი შრომის სტაჟიდან მინიმუმ 6 თვე გატარებული ექნება „ცესკოს“ წევრის როლში. რაც შეეხებათ აპარატის მოხელეებს, მათ მინიმუმ 25 წლიანი საერთო სტაჟიდან სულ მცირე 8 წელი ცესკოში უნდა ჰქონდეთ ნამუშევარი“,- განაცხადა ანა მიქალაძემ.