„25-ში გაიმართება პირველი სხდომა, ეს არის დიდი გაუგებრობა და სირცხვილი, მე ასე შევაფასებდი ამ ფაქტს“,- განაცხადა საპარლამენტო ფრაქცია „საქართველოს პატრიოტების“ წევრმა, ადა მარშანიამ „ჯი-ეიჩ-ენთან“ საუბარში.
მისი თქმით, პარლამენტის ტერიტორიული მთლიანობის აღდგენის საკითხთა დროებითი კომისია მუშაობას მხოლოდ ახლა იწყებს, არადა ახალი პარლამენტის შეკრებიდან უკვე 5 თვე გავიდა.
„ქვეყნის უპირველეს საკითხზე, რომელსაც სახელმწიფოს გამთლიანება ჰქვია, საპარლამენტო კომისია იკრიბება მხოლოდ 25 აპრილს, არადა პარლამენტი 18 ნოემბერს შეიკრიბა და მას მერე 5 თვე გავიდა. მსგავსი რამ ხდება მაშინ, როდესაც ეს კომისია ყველაზე მუშა, მებრძოლი და აქტიური უნდა იყოს“- განაცხადა მარშანიამ.
მისი თქმით, საწყის ეტაპზე იყო ხარვეზები და თანამდებობის გაყოფის შესახებ მსჯელობები, მაგრამ ამის გამო ხუთ თვიანი დაგვიანება ყოვლად მიუღებელი დამოკიდებულებაა.
„ვფიქრობ ამის მიზეზი არა ტექნიკური ხარვეზი, არამედ მენტალური პრობლემაა. აბსოლუტურად მიუღებელი და სამარცხვინო მიდგომა აქვთ ასეთი უსერიოზულესი საკითხის მიმართ“,- განუცხადა ადა მარშანიამ „ჯი-ეიჩ-ენს“.
