"საერთაშორისო გამჭვირვალობა" საკონსტიტუციო კომისიაში ბოლომდე დარჩება, - განაცხადა ორგანიზაციის ხელმძღვანელმა ეკა გიგაურმა. მისივე თქმით, მმართველი გუნდი ბოლომდე არაკომფორტულ მდგომარეობაში უნდა იმყოფებოდეს. რაც შეეხებათ პოლიტიკურ პარტიებს, გიგაურის შეფასებით, მათ მიიღს პოლიტიკური გადაწყვეტილება.
ეკა გიგაური მიიჩნევს, რომ საკონსტიტუციო კომისიის მუშაობის მიღწევა კონსტიტუციაში ევროატლანტიკური კურსის აღნიშვნაა.
„ჩვენთვის ყველაზე პრობლემატურია საარჩევნო სისტემა. ერთი მხრივ, გადავედით პროპორციულ სისტემაზე, მაგრამ დიდი პრობლემაა და ფაქტიურად, უსამართლოა გაუნაწილებელი მანდატების განაწილების საკითხი. ვფიქრობთ, ამ მიმართულებით პროგრესი ნამდვილად არ არის საკონსტიტუციო კომისიაში მუშაობის კუთხით. მეორე მნიშვნელოვანი საკითხია, პრეზიდენტის არჩევის წესი. ჩვენ ყოველთვის ვსაუბრობდით, რომ მნიშვნელოვანია, საქართველოში იყოს უფრო დაბალანსებული მართვის სისტემა და ამას უფრო ეფექტურად მოახერხებს პირდაპირი წესით არჩეული პრეზიდენტი. მაშინ, როცა გამოცდილება გვაქვს საქართველოში, რომ მმართველი პარტია დიდი უმრავლესობით მოდის ხოლმე მთავრობაში, კარგი იქნება დამოუკიდებელი არბიტრი არსებობდეს უფრო მეტი უფლებამოსილებით და ძალაუფლებით, რომ ეს სისტემა დააბალანსოს.
მეორე მხრივ, უნდა მივესალმოთ იმას, რომ საქართველოს კონსტიტუციაში აღნიშნული იქნა საქართველოს ევროატლანტიკური კურსი და ეს არის ძალიან დიდი მიღწევა. ასევე მნიშვნელოვანია ის მუხლები, რომელიც ეხება ეკონომიკურ თავისუფლებას, საინვესტიციო გარემოს გაუმჯობესებას, პარლამენტის ზედამხედველობის ფუნქციის გაძლიერებას“, - განაცხადა ეკა გიგაურმა.
ევროპული საქართველოს, თავისუფალი დემოკრატებისა და ლეიბორისტული პარტიის წარმომადგენლები 1 საათში ერთობლივ ბრიფინგს გამართავენ. ისინი საკონსტიტუციო კომისიას ოფიციალურად დატოვებენ.