მერობის კანდიდატთან დაკავშირებით, კრიტერიუმები და მოთხოვნები იქნება უცვლელი, - განაცხადა თბილისის მერმა დავით ნარმანიამ. მისივე თქმით, მმართველ გუნდში მერობის კანდიდატის შესახებ საბოლოო გადაწყვეტილება მიღებული არ არის.
,,მნიშვნელოვანია ის, რომ იქნება კონსტულტაციები, გუნდური გადაწყვეტილება და შესაბამისად, ამ გადაწყვეტილების მიხედვით იქნება კანდიდატურა შერჩეული, რაც ყველაზე მთავარია, ვიცით ის, რომ კრიტერიუმები და მოთხოვნები ჩვენი გუნდის მხრიდან კანდიდატთან დაკავშირებით იქნება უცვლელი. კანდიდატი უნდა იყოს სამეურნეო საქმიანობაში კარგად გარკვეული ადამიანი, უნდა იცნობდეს ქალაქს, მის თავისებურებებს, სპეციფიკას, ჰქონდეს შესაბამისი კომუნიკაციის ნიჭი და უნარი. ასე, რომ ეს ყველაფერი იქნება გათვალისწინებული”, - განაცხადა დავით ნარმანიამ.
რაც შეეხება მის სურვილს დედაქალაქის მერის პოსტზე მეორედ იყაროს კენჭი, ნარმანიამ განაცხადა, რომ დაემორჩილება გუნდის გადაწყვეტილებას. მისივე თქმით, დავით ნარმანიასა და კახა კალაძის შორის არჩევანიც პოლიტსაბჭოს გადასაწყვეტია.