თბილისში დღეს გამართულ კონფერენციაზე საქართველოს პარლამენტის თავმჯდომარემ კონსტიტუციის 94-ე მუხლის ცვლილებაზე ისაუბრა. რაც გულისხმობს გადასახადების გაზრდასთან დაკავშირებით რეფერენდუმის აუცილებლობაზე ცვლილებას.
ამ ინიციატივასთან დაკავშირებით „ჯი-ეიჩ-ენი“ ექსპერტს ეკონომიკის საკითხებში ბესო ნამჩავიძეს ესაუბრა.
„მე ვთვლი რომ უარყოფითი იქნება ამის გაკეთება, ჯერ-ჯერობით საქართველო არის ისეთი განვითარების ქვეყანა, რომ სტაბილური ბიზნეს გარემო გვჭირდება. ეკონომიკური მიმართულება მომავალი ინვესტორებისთვის გარანტიას ქმნიდა, რომ გადასახადები ამ ქვეყანაში არ გაიზრდება და რთულია გაზრდა. ამ მუხლის გაუქმება შეიძლება იმდენად არ იყოს პრობლემა, რამდენადაც სურვილი რომ იგი შეიცვალოს. თუ მიზნად გადასახადების გაზრდა არ აქვთ, ამ მუხლს არ შეეხებოდნენ. იმასაც თუ გავითვალისწინებთ, რომ ჩვენი საარჩევნო სისტემით რეალურად მოსახლეობის 25%-ს შეუძლია საკონსტიტუციო უმრავლესობის ჩამოყალიბება , ასეთ პირობებში უფრო რთული უნდა იყოს გადასახადების შეცვლა და მხოლოდ პარლამენტის თანხმობა არ უნდა იყოს საკმარისი. რომ შევედაროთ ევროპის ქვეყნების გამოცდილებას, არ არის ასე, მაგრამ მე ვფიქრობ, რომ ის რაც ჩვენთანაა უფრო უკეთესია და არა უარესი. ამიტომ ამ მუხლის შეცვლა ჩვენს ბიზნეს გარემოს დააზარალებს“, - განუცხადა „ჯი-ეიჩ-ენს“ ბესო ნამჩავიძემ.
