თურქეთში გამართული რეფერენდუმის მიხედვით, პრეზიდენტმა ერდოღანმა მნიშვნელოვნად გაიფართოვა უფლებამოსილება და საპარლამენტო მმართველობიდან საპრეზიდენტოზე გადაიყვანა, ხოლო თავად 2029 წლამდე შეეძლება თანამდებობაზე დარჩენა.
განვითარებული მოვლენების შესახებ „ჯი-ეიჩ-ენი“ ექსპერტ გია ხუხაშვილს ესაუბრა.
„რთული პროცესი მიდის, თურქეთი რამოდენიმე წელია გზაჯვარედინზე დგას. ვითარება გაართულა შარშანდელმა სამხედრო გადატრიალების მცდელობამ, რის შემდეგაც ხელისუფლებას უნდა გადაედგა რაიმე რადიკალური ნაბიჯი, რათა შემდგომი რისკები აეცილებინა თავიდან. სწორედ მაშინ განვითარებულმა დრამატულმა მოვლენებმა მიგვიყვანა დღევანდელ რეალობამდე“,- განაცხადა გია ხუხაშვილმა „ჯი-ეიჩ-ენთან“ საუბარში.
მან ბოლო დროს თურქეთსა და ევროპას შორის გაღვივებულ კონფლიქტზეც ისაუბრა და საქართველოს როლზეც გაამახვილა ყურადღება.
„ევროპასთან სირთულეები დიდი ხანია დაწყებულია, თუმცა შეფარულად. ასევე შეერთებულ შტატებთანაც არაერთგვაროვანი ურთიერთობა აქვთ, რადგან თურქეთის ხელისუფლებას დიდი ეჭვი აქვს, რომ სამხედრო გადატრიალების მცდელობისას შეერთებული შტატები რაღაც ფორმით მონაწილეობდა. რთული ურთიერთობა აქვთ რუსეთთანაც, თუმცა აქვთ დიდი ამბიციები, ხოლო როდესაც არის დიდი ამბიციები და სირთულეები, მოქმედების დიაპაზონი საკმაოდ შეზღუდულია, ამისგან გადარჩენა კი შესაძლოა ძალაუფლების კონსოლიდაცია იყოს რაღაც მისიონისტური გეგმების ირგვლივ. ამ მიზნების განხორციელების შესაძლებლობა ცალკე საკითხია, მაგრამ როდესაც ამ რეფერენდუმის შედეგად ერდოღანი პოზიციას გაიმყარებს, მას დაჭირდება რაიმე სახის წარმატება რათა გაამართლოს ცვლილებები. სერიოზული კითხვაა ის, თუ რა მიმართულებით და რა ვექტორით განვითარდება მოვლენები ასეთ მდგომარეობაში რაიმე მიმართულებით გამარჯვების ფიქსაციას აქვს თავისი ვარიანტები, ერთ-ერთ ვარიანტად შესაძლოა საქართველოც იყოს გათვალისწინებული. ვფიქრობ ჩვენი ხელისუფლება უნდა ფიქრობდეს ამაზე და რაიმე სახის პრევენციას ეწეოდეს ვითარების შესაძლო გართულებასთან დაკავშირებით. ინტეგრაციის ხარისხიდან გამომდინარე, და ამ შემთხვევაშიც ჩვენ გვჭირდება რაიმე ტიპის დამცავი მექანიზმები.
ევროკავშირთან დაკავშირებით დიდი ხანია გზა ჩაკეტილია და ეს ამ რეფერენდუმიდან არ დაწყებულა, მანამდეც ასე იყო. ჩვენ გვახსოვს ლტოლვილებთან დაკავშირებით, სიკვდილით დასჯასთან დაკავშირებითთ. ევროკავშირსა და თურქეთს შორის მსოფხედველობითი წინააღმდეგობა დიდი ხანია მიმდინარეობს. ასევე რთულია ლაპარაკი ამ სიტუაციიდან გამომდინარე საქართველოს გარღვევაზე, ჩვენ განხილვის მაგიდის მიღმა ვართ, სადღაც უჯრაში შენახული“,-განაცხადა გია ხუხაშვილმა.
