ლავროვის აფხაზეთში ვიზიტი საქართველოს მთავრობის პოლიტიკის გადახედვის ბოლო წვეთი უნდა გახდეს , - აცხადებს ექსპერტი ბათუ ქუთელია. ის არ გამორიცხავს, რომ რუსეთის ეს ნაბიჯი საქართველოსა და საერთშორისო საზოგადოების გაღიზიანებისკენ იყოს მიმართული.
„ლავროვის ვიზიტი უნდა გახდეს ბოლო წვეთი იმ პოლიტიკის გადახედვის, რომელიც საქართველოს მთავრობამ 2012 წელს დაიწყო. თავის საფუძვლებში მცდარი პოლიტიკა იყო რუსეთის მიმართ და ამან თავის შედეგები მოიტანა. წინააღმდეგ შემთხვევაში, ასე გამხოლოებულად ბუნებრივია, საქართველოს გაუჭირდება საერთაშორისო საზოგადოების აზრის მობილიზება რუსეთის წინააღმდეგ,“ - აცხადებს ბათუ ქუთელია.
რუსეთის საგარეო საქმეთა მინისტრი სერგეი ლავროვი 18-19 აპრილს ოკუპირებულ აფხაზეთში ოფიციალური ვიზიტით ჩადის. ლავროვი აფხაზეთში რუსეთის საელჩოს ახალი შენობის გახსნაში მონაწილეობას მიიღებს. 19 აპრილს კი ლავროვი საოკუპაციო რეჟიმის ე.წ პრეზიდენტსა და საგარეო საქმეთა მინისტრს შეხვდება. ვიზიტისას განიხილება ოკუპირებულ აფხაზეთსა და რუსეთს შორის ურთიერთობები.