სერგეი ლავროვის ოკუპირებულ აფხაზეთში ჩასვლა, რუსეთის მხრიდან საოკუპაციო პოლიტიკის გაგრძელება და მიზანმიმართული პროვოკაციაა, - განაცხადა „ერთიანი ნაციონალური მოძრაობის“ პოლიტიკური საბჭოს წევრმა, გიორგი ბარამიძემ, ლავროვის სოხუმში ვიზიტის შეფასებისას.
მისი თქმით, საქართველო საერთაშორისო არენაზე უნდა გააქტიურდეს.
„რუსეთი, ამას, როგორც ოკუპანტი სახელმწიფო აკეთებს თავხედურად, პროვოკაციულად, მიზანმიმართულად და ამისთვის არანაირ არც პოლიტიკურ და არც დიპლომატიურ ფასს არ იხდის“, - განაცხადა გიორგი ბარამიძემ.
რუსეთის საგარეო საქმეთა მინისტრი სერგეი ლავროვი 18-19 აპრილს ოკუპირებულ აფხაზეთში ოფიციალური ვიზიტით ჩადის. ლავროვი აფხაზეთში რუსეთის საელჩოს ახალი შენობის გახსნაში მონაწილეობას მიიღებს. 19 აპრილს კი ლავროვი საოკუპაციო რეჟიმის ე.წ პრეზიდენტსა და საგარეო საქმეთა მინისტრს შეხვდება. ვიზიტისას განიხილება ოკუპირებულ აფხაზეთსა და რუსეთს შორის ურთიერთობები.