„რამდენად სერიოზულია კომისიის მუშაობის დასრულებამდე 3 დღით ადრე კომისიის დატოვება?,“-განაცხადა „ქართული ოცნების წევრმა, ზაქარია ქუცნაშვილმა „ჯი-ეიჩ-ენთან“ საუბრისას. მან „ნაციონალური მოძრაობის“ მიერ საკონსტიტუციო კომისიის დატოვებას არასერიოზული ნაბიჯი უწოდა და განაცხადა, რომ კონსტიტუციაზე მუშაობის დასრულებამდე ნაადრევია შესაძლო ცვლილებებზე ფიქრი, რადგან ყოველი ინიციატივა ჯერ კიდევ განსახილველია.
„პროექტზე მუშაობა დასრულებული არ არის, საყოველთაო განხილვა არ ჩატარებულა და არ დასრულებულა, პარლამენტს კი საჯარო განხილვები არ ჩაუტარებია ამ თემაზე. ნაადრევია დასკვნების გამოტანა.“- განაცხადა ზაქარია ქუცნაშვილმა
იგი „ნაციონალური მოძრაობის“ საპარლამენტო ფრაქციის თავმჯდომარის, რომან გოცირიძის განცხადებას გამოეხმაურა და განაცხადა, რომ არაპირდაპირი არჩევითობის შემთხვევაში პრეზიდენტის დამოუკიდებლობა არ ილახება.
„პრეზიდენტი კი არა, ყველა თანამდებობის პირი დამოკიდებულია კანონზე. თუ ვსაუბრობთ პოლიტიკური ძალისა და უარყოფითი გავლენებისაგან დამოუკიდებლობაზე, ეს პიროვნებაზე იქნება დამოკიდებული“-განაცხადა „ჯი-ეიჩ-ენთან“ ზაქარია ქუცნაშვილმა.
შეგახსენებთ, რომ „ნაციონალურმა მოძრაობამ“ საკონსტიტუციო კომისია პროტესტის ნიშნად დატოვა. მათი თქმით, ეს ნაბიჯი გამოიწვევს როგორც საგარეო, ასევე შინა ბერკეტების ამოქმედებას ხელისუფლებაზე ზეწოლისათვის, რათა მათ შეძლონ ოპონენტებთან საერთო ენის გამონახვა და პრობლემურ საკითხებზე მსჯელობა.
რომან გოცირიძემ კი სამომავლოდ არაპირდაპირი არჩევნების წესით არჩეულ პრეზიდენტს „ქართული ოცნების“ ნოტარიუსი უწოდა. მისი თქმით, არსებული ინიციატივის კონსტიტუციაში მიღების შემთხვევაში, პრეზიდენტი სახელისუფლებო ძალის ნებას შეასრულებს, უფლებრივად კი დედოფალზე სუსტი იქნება.
„ქართული ოცნების“ ნებისმიერი ცნობადი სახე, უცებ დახუჭეთ თვალები და დასვით პრეზიდენტად, იქნებოდა აბსოლუტურად ყურმოჭრილი მონა. თუნდაც იგივე მოსმენების კანონზე, თუნდაც ეროვნული ბანკის კანონზე იგივე პოზიციისა იქნებოდა, როგორც ნებისმიერი „ქართული ოცნების“ წარმომადგენელი. ამგვარად იგი იქნებოდა „ქართული ოცნების“ ნოტარიუსი, რომელიც მოაწერდა კანონს ხელს. დედოფალივითაც კი არ იქნებოდა, მას რაღაც უფლებები მაინც აქვს“,- განაცხადა რომან გოცირიძემ „ჯი-ეიჩ-ენთან“ საუბარში.
