„კომისიის დატოვებაც არის კონსტიტუციის გაუმჯობესების ერთ-ერთი ხერხი“- განაცხადა „ნაციონალური მოძრაობის“ საპარლამენტო ფრაქციის თავმჯდომარე, რომან გოცირიძემ „ჯი-ეიჩ-ენთან“ საუბრისას. მისი თქმით, კომისიის დატოვება იყო პოლიტიკური ნაბიჯი და საზოგადოებისთვის მანიშნებელი, რომ უმრავლესობა ცდილობს საკუთარ თავზე მოირგოს კონსტიტუცია. გოცირიძის თქმით, იგი არ მოუწოდებს კომისიის სხვა წევრებს მსგავსი ნაბიჯის გადადგმისკენ, მაგრამ ყველამ თავად უნდა გააცნობიეროს საკუთარი როლი მის მუშაობაში.
„ყველა ინდივიდუალურად ირჩევს მუშაობის საკუთარ ფორმას, ხოლო კომისიის დატოვებაც არის კონსტიტუციის გაუმჯობესების ერთ-ერთი ხერხი. ჩვენ ვმუშაობდით კომისიაში, მაქსიმალურად გამოვიყენეთ ჩვენი რესურსები და დროულად ვღებულობდით ინფორმაციას, მათ შორის ვენეციის კომისიიდან, ამიტომ ინფორმაციის ფლობაც მნიშვნელოვანი იყო. რაც შეეხება კომისიის დატოვებას, ესაა პოლიტიკური აქტი და საზოგადოების გამოფხიზლების ერთ-ერთი ფორმა, რომელიც ამ პრობლემაზე ამახვილებს ყურადღებას როგორც ქვეყანაში, ასევე ქვეყნის გარეთ. როდესაც მთავარი ოპოზიციური პარტია მსგავს განცხადებას აკეთებს, ეს ნიშნავს რომ მას ექნება საერთაშორისო რეზონანსიც და ფაქტობრივად კონსტიტუციის გაუმჯობესების ადგილობრივი და საერთაშორისო ბერკეტები ამოქმედდება. ჩვენი ეს მოქმედება იყო იმ მიზნით, რომ ის არადემოკრატიული ნაბიჯები მთავრობამ უკან წაიღოს და პარლამენტში შემოსული დოკუმენტი არ იყოს ისეთი, როგორიც ახლაა“,- განაცხადა რომან გოცირიძემ „ჯი-ეიჩ-ენთან“ საუბარში.