საქართველოს ყოფილი პრეზიდენტი მიხეილ სააკაშვილი მალტაში, ევროპის სახალხო პარტიის მიერ გამართულ კონგრესზე სიტყვით გამოვიდა. მან EPP-ს ვიზალიბერალიზაციის პროცესში საქართველოს მხარდაჭერისთვის მადლობა გადაუხადა.
მისი თქმით, ვიზალიბერალიზაციისთვის მზადება ჯერ კიდევ გასული მთავრობის პერიოდში დაიწყო. ,,აღნიშნულთან დაკავშირებით მოლაპარაკებების წარმოება ჩემმა მთავრობამ დაიწყო. ჩვენ მოვამზადეთ ქვეყანა ამისთვის, ავაშენეთ აეროპორტები, მოვამზადეთ ინფრასტრუქტურა, თუმცა არ გვჯეროდა, რომ ეს მოხდებოდა“, - განაცხადა სააკაშვილმა.
მისივე თქმით, დღეს ორ ფრონტზე იბრძვის.
„მაქვს პატივი ორ ფრონტზე ვიბრძოდე. საქართველოში მე „ნაციონალური მოძრაობის“ საპატიო თავმჯდომარე და უკრაინაში სწრაფად მზარდი პარტიის ლიდერი ვარ, თუმცა დღეს მე აქ საქართველოს წარმოვადგენ და საქართველოზე მინდა ვისაუბრო. 2012 წელს ჩვენ კიდევ ერთი საამაყო მიღწევა გვქონდა. მრავალწლიანი წარმატების შემდეგ, პირველად საქართველოს ისტორიაში, ჩვენ ხელისუფლების არაძალადობრივი, მშვიდობიანი, დემოკრატიული გადაცემა მოვახდინეთ, მაგრამ პრობლემა ის არის, რომ ჩვენ ხელისუფლება გადავეცით იმ ხალხს, ვინც მზად არ იყო და არ არის ამისთვის“, - აღნიშნა სააკაშვილმა სიტყვით გამოსვლისას.
მისივე თქმით, ,,2008 წელს რუსეთმა საქართველოს დაპყრობა ვერ შეძლო, თუმცა ოთხი წლის შემდეგ, რუსმა ოლიგარქმა და რუსეთმა ახლა უკვე ცნობილი აქტიური ზომები გამოიყენეს - პროვოკაციები, მოსყიდვა, ყველა ის მეთოდი, რომელსაც რუსეთი მსოფლიოში იყენებს, პირველად საქართველოში იყო გამოყენებული. მათ მოკლეს რეფორმების ყველაზე წარმატებული ექსპერიმენტი“, - განაცხადა მიხეილ სააკაშვილმა.
