ყველა კონსულტაციაში მივიღებთ მონაწილეობას, რომელიც მიმართული იქნება უკანონო მოსმენების შესაძლებლობის აღკვეთისკენ, - განაცხადა ,,ევროპული საქართველოს“ წევრმა ირაკლი აბესაძემ.
„ისევე როგორც ამ ანტიკონსტიტუციურ კანონს მიღების პროცესში, ასევე გამოქვეყნების შემდეგაც ჩვენ რა თქმა უნდა ყველა კონსულტაციაში რომელიც მიმართული იქნება ადამიანის უფლებების დაცვისკენ და უკანონო მოსმენების შესაძლებლობის აღკვეთისკენ ქვეყანაში მონაწილეობას მივიღებთ ძალიან აქტიურად. იქნება ეს საქართველოს პრეზიდენტთან ერთად დაგეგმილი კონსულტაციები, არასამთავრობო ორგანიზაციებთან თუ სხვა პოლიტიკურ პარტიებთან ერთად.
ჩვენ კანონპროექტის განხილვისას გვქონდა ალტერნატიული შეთავაზება, რომელიც თავის დროზე წარვუდგინეთ არასამთავრობო ორგანიზაციებს, პოლიტიკურ პარტიებს და იმ დროიდანვე დაიწყო კონსულტაციები კანონის ძალაში შესვლის შემთხვევაში მისი საკონსტიტუციო სასამართლოში თუ შემდგომში ადამიანის უფლებათა ევროპულ სასამართლოში გასაჩივრების შესახებ, ასე რომ ჩვენ ამ პროცესში თავიდან ბოლომდე მივიღებთ მონაწილეობას“, - აცხადებს აბესაძე.
