მოხარული ვარ, რომ საქართველოსათვის ამ უმნიშვნელოვანეს დღეს საბერძნეთი გმასპინძლობთ. გილოცავთ ვიზალიბერალიზაციას. დარწმუნებული ვარ, საქართველო მაქსიმალურად გამოიყენებს ვიზალიბერალიზაციით მიღებულ შესაძლებლობებს,” - ამ სიტყვებით შეხვდა საბერძნეთის პრემიერმინისტრი ქართველ კოლეგას.
პირისპირ გამართულ შეხვედრაზე ალექსის ციპრასმა გიორგი კვირიკაშვილს საქართველოს მოქალაქეებისთვის შენგენის ზონაში უვიზო მიმოსვლის ამოქმედება მიულოცა და ხაზი გაუსვა ევროინტეგრაციის გზაზე საქართველოს მიერ მიღწეულ პროგრესს. საქართველოს პრემიერმინისტრმა მადლობა გადაუხადა ალექსის ციპრასს საქართველოს მხარდაჭერისთვის. მან ბერძენ კოლეგას საბერძნეთის დამოუკიდებლობის დღე მიულოცა და ყურადღება გაამახვილა საქართველოსა და საბერძნეთს შორის დიპლომატიური ურთიერთობების დამყარების 25-ე წლისთავის მნიშვნელობაზე.
პრემიერმინისტრებმა გამოთქვეს მზაობა, გააძლიერონ თანამშრომლობა საერთო მიზნების მისაღწევად და კიდევ უფრო განამტკიცონ ორ ქვეყანას შორის არსებული ისტორიული კავშირები.
პირისპირ შეხვედრის შემდეგ გამართულ გაფართოებული ფორმატის შეხვედრაზე მხარეებმა განიხილეს საქართველოსა და საბერძნეთის პარტნიორული ურთიერთობის ძირითადი საკითხები და იმსჯელეს ეკონომიკის, ვაჭრობის, ტურიზმის, კულტურის, განათლების სფეროებში თანამშრომლობის კუთხით არსებულ პოტენციალზე. ყურადღება გამახვილდა საინვესტიციო ურთიერთობების განვითარების პერსპექტივებზე. აღინიშნა, რომ ახლო მომავალში დაგეგმილია ბერძნული ბიზნესდელეგაციის ვიზიტი თბილისში, რაც ბერძენ ბიზნესმენებს საქართველოს საინვესტიციო გარემოს უკეთ შესწავლის შესაძლებლობას მისცემს.
საბერძნეთის პრემიერმინისტრმა ალექსის ციპრასმა კიდევ ერთხელ გამოხატა სრული მხარდაჭერა საქართველოს ევროინტეგრაციის პროცესებისადმი.
საბერძნეთში ვიზიტის ფარგლებში, საქართველოს გიორგი კვირიკაშვილი ათენში, ქართულ-ბერძნულ კონფერენციაზე „საქართველო - ევროპიდან ევროპამდე“ სიტყვით გამოვიდა.
გიორგი კვირიკაშვილი ათენში, ახალგაზრდებთან, ჟურნალისტებთან და მთავრობის წარმომადგენლებთან ერთად დღეს დილით უვიზოდ გაემგზავრა. ათენში ვიზიტი საქართველოს ევროკავშირთან უვიზო მიმოსვლის ამოქმედებას უკავშირდება.