თბილისის მერის მოადგილემ, ნინა ხატისკაცმა გადაცემა „ხალხის პოლიტიკის“ ეთერში პანთეონების შესახებ ისაუბრა. მისი თქმით, დიდუბისა და მთაწმინდის პანთეონები ამჟამად დახურულია და ახალი პანთეონი მახათას მთაზე მოეწყობა.
„დაგიდასტურებთ, რომ მახათას მთა და იქ პანთეონის განაშენიანება გადაწყვეტილია. 2015 წლიდან მიმდინარეობს დისკურსიები ამ თემაზე. რამოდენიმე ადგილი იყო თავიდან შერჩეული, თუმცა ყველა ალტერნატივა იყო ქალაქს გარეთ. დიდუბის პანთეონიც, როდესაც პანთეონად ჩამოყალიბდა, იყო ქალაქის მიღმა. ქალაქში პანთეონების გაშენება არ შეიძლება ბევრი სხვადასხვა მიზეზების, მათ შორის სანიტარული ნორმების გამო.
მახათას მთა შეირჩა როგორც საუკეთესო ვარიანტი. ტერიტორიის განფენილობის, რელიების, მისასვლელი გზისა და ბევრი სხვა კომპონენტის გათვალისწინებით. დღესდღეობით უკვე დასრულებულია ტენდერი სამშენებლო სამუშაოებზე და ამ დღეებში დაიწყება 200 ადგილის მოწყობა მახათას მთაზე. ეს კი დაახლოებით ნახევარი იქნება იმ მთლიანი ტერიტორიისა, რომელიც გათვლილია პანთეონზე.“ - განაცხადა ნინა ხატისკაცმა.
მან ასევე საზოგადო მოღვაწეთა დაკრძალვის წესის შესახებაც ისაუბრა. ხატისკაცის განცხადებით, მერია მუშაობს წესების შემუშავებისთვის, რომლითაც შემდგომ სპეციალური კომისია იხელმძღვანელებს. ჯერ ნაადრევია წინასწარ თქმა, მაგრამ არის საერთო აზრი, რომ დაიკრძალება მხოლოდ საზოგადო მოღვაწე, ოჯახის წევრის გარეშე.
