აღმაშენებლის ხეივანში მომხდარ ავარიაში მონაწილე მძღოლი დანაშაულს აღიარებს და მომხდარს ნანობს, - ამის შესახებ ადვოკატმა ლევან კვინიკაძემ განაცხადა. მისივე თქმით, თორნიკე ტუღუშის პოზიციაა, რომ თავი არ იმართლოს და პატიმრობაში იყოს.
„არავისთვის საფრთხეს არ წარმოადგენს ეს ადამიანი. თორნიკე ნანობს მომხდარს და ურჩევნია, რომ არ იბრძოლოს, თავი არ იმართლოს, შესაბამისად იყოს პატიმრობაში“, - განაცხადა ადვოკატმა.
აღმაშენებლის ხეივანში მომხდარ ავარიაში მონაწილე მძღოლს აღკვეთის ღონისძიების სახით დღეს პატიმრობა შეეფარდა. აღნიშნული გადაწყვეტილებით მოსამართლემ სრულად გაიზიარა პროკურატურის შუამდგომლობა ბრალდებულისთვის აღკვეთის ღონისძიების სახით პატიმრობის შეფარდების თაობაზე. აღმაშენებლის ხეივანში გასულ კვირას მომხდარ ავტოსაგზაო შემთხვევას 8 წლის გოგონას სიცოცხლე ემსხვერპლა. მძიმედაა დაშავებული არასრულწლოვნის დედა.
ბრალდებულს, სასამართლოს ინფორმაციით, ნარკოტიკული საშუალების მოხმარების ფაქტი დაუდგინდა.