ტვერის რაიონულმა სასამართლომ ოპოზიციონერი ალექსეი ნავალნი 20 ათასი რუბლით დააჯარიმა. ოპოზიციის ლიდერი მასობრივი ღონისძიებების ჩატარების კანონის დარღვევაში დაადანაშაულეს. მას ბრალდება კიდევ ერთი, სამართალდამცავი ორგანოების თანამშრომლებისადმი დაუმორჩილებლობის მუხლით აქვს წაყენებული, თუმცა განაჩენი ჯერ გამოტანილი არ არის. ნავალნი თავს დამნაშავედ არ ცნობს. მისი თქმით, მან მიტინგის ჩატარების განცხადებით მოსკოვის მუნიციპალიტეტს რამდენჯერმე მიმართა, თუმცა პასუხი ვერ მიიღო. დაცვის მხარე ნავალნის სასამართლო დარბაზიდან გათავისუფლებას ითხოვდა. ოპოზიციონერი მოსკოვის ცენტრში გუშინ არასანქცირებულ ანტიკორუფციულ მიტინგზე გამოჩენისთანავე დააკავეს.
