ამ წუთებში „ბავშვთა სამყაროს“ დაზარალებული მოვაჭრეები პარლამენტის წინ აქციას მართავენ. იგი ცოტა ხნის წინ დაიწყო და მონაწილეთა მოთხოვნები უცვლელია. ისინი პირველადი კომპენსაციის სახით 5000 ლარის გამოყოფას, საბანკო ვალდებულებების შეჩერებას და დაზარალებულის სტატუსს ითხოვენ.
მათი თქმით, ისინი აპირებენ საქართველოში არსებულ ყველა საელჩოს მიაწვდინონ ხმა.
საპროტესტო აქციაზე მივიდა პარლამენტის ვიცე-სპიკერი ირმა ინაშვილი.
„ჩვენ ვთავაზობთ ხელისუფლებას, შეიქმნას სახელმწიფო კომისია, რომელშიც გაერთიანდებიან ხელისუფლების წარმომადგენლები, პარლამენტის წევრები, დაზარალებულები, იურისტები და დაახლოებით ორი კვირის ფარგლებში დაიდოს გეგმა, როგორ უნდა მოხდეს ზარალის აღნუსხვა და შემდეგ ამ ზარალის კომპენსირება,“ - განაცხადა ირმა ინაშვილმა.
აქციაზე იმყოფება საქართველოს ადვოკატთა ასოციაციის თავმჯდომარე ზაზა ხატიაშვილიც.
„ჩვენი მეგობარი სახელმწიფოების ელჩებს გავაგებინებთ, თუ როგორ გადაწვა ხელისუფლებამ ბავშვთა სამყარო, როგორ დატოვა ეს ხალხი ქუჩაში და როგორ ზემოქმედებენ ამ ადამიანებზე, რომ ელემენტარულად მათ დახმარება არ მიიღონ, როგორ არღვევენ მათ გამოხატვის თავისუფლებას, როგორ დაუნგრიეს კარავი და მთელი ხელისუფლება ჩართულია ამ ადამიანების წინააღმდეგ,“ - განაცხადა ზაზა ხატიაშვილმა.