,,რუსთავი 2“ -ის მეწილე ლევან ყარამანაშვილი უკმაყოფილებას გამოთქვამს იმასთან დაკავშირებით, რომ ტელეკომპანიამ მისი გუშინდელი განცხადება სათანადოდ არ გააშუქა. ამის შესახებ იგი სოციალურ ქსელში წერს და აცხადებს, რომ არანარი შუამავალი შპს-ს არ განიხილება. 91-პროცენტიანი წილის მფლობელები ლევან და გია ყარამანიშვილები კოლექტივთან პირდაპირი კონსულტაციების რეჟიმზე გადადიან.
,,სამწუხაროა, რომ ჩვენი გუშინდელი განცხადება, რომელიც 15:25-ზე გავრცელდა, პრაქტიკულად არ გაშუქებულა (მშრალად გავიდა 6 საათიანი კურიერის შუაში, თემის გაუშლელად, და საერთოდ არ გაშუქებულა 9 საათიან კურიერში). ეს იმ ფონზე, როცა გენერალური დირექტორის მიერ მოწვეულ თათბირს ამხელა დრო დაეთმო ეთერში. ჩვენი განცხადება რომ გაშუქებულიყო, საზოგადოება და ჩვენი კოლექტივი ბევრ უხერხულობას აცდებოდა (პირველ რიგში, ზემოხსენებული თათბირის კონტექსტში). ამიტომ, ხელახლა, უცვლელად ვავრცელებთ ჩვენს გუშინდელ განცხადებას (სადაც ხაზს ვუსვამთ, რომ არანარი შუამავალი შპს-ს მონაწილეობა არ განიხილება) და ხვალიდან გადავდივართ კოლექტივთან პირდაპირი კონსულტაციების რეჟიმში“, - წერს ყარამანაშვილი.
https://www.facebook.com/levan.karamanishvili/posts/1021300769477362
როგორც ცნობილია, ტელეკომპანია "რუსთავი 2"-ის თანამშრომლები ორშაბათს შპს-ს დაფუძნებას გეგმავენ, რომლის სახელწოდება იქნება "რუსთავი 2 ჩემია". აღნიშნულ საკითხთან დაკავშირებით "რუსთავი 2"-ში შიდა თათბირი ჩატარდა, სადაც გადაწყდა, რომ ტელეკომპანიის ყველა დეპარტამენტიდან აირჩევა წარმომადგენელი აღნიშნულ შეზღუდული პასუხისმგებლობის საზოგადოებაში. შიდა თათბირის კადრები ეთერშიც გავიდა.ამასტან დაკავშირებით ტელეკომპანიის ცნობილმა წამყვანებმა უკმაყოფილება საჯაროდ დააფიქსირეს.
