როდესაც უფლებას მართმევ, ხომ უნდა ამიხსნა, რით იქნება ჩემი ცხოვრება უკეთესი, - ამის შესახებ გიორგი მარგველაშვილმა პრეზიდენტის არჩევის წესის შეცვლაზე საუბრისას განაცხადა.
"საზოგადოებას, რომელიც პრეზიდენტის არჩევის უფლებით დამოუკიდებლობის პირველი დღეებიდანაა აღჭურვილი, ეს უფლება უნდა შეუნარჩუნდეს. პირველ რიგში, ეს არის ჩვენი, როგორც ამომრჩევლის, უფლება. როდესაც უფლებას მართმევ, ხომ უნდა ამიხსნა, რით იქნება ჩემი ცხოვრება უკეთესი. პოლიტიკოსების ბევრი განცხადება მომისმენია, იმასაც ამბობდნენ, არჩევნებზე წასვლით ხალხს ნუ დავღლით, არ გვინდა, ისხდნენ სახლში წყნარად ტელევიზორებთანო. ეს არგუმენტები კომიკურია. მოქალაქეობრივ უფლებას რომ მართმევ, უნდა მითხრა, რატომ მართმევ. პრეზიდენტს მაღალი პოლიტიკური მანდატი აძლევს უფლებას, განაცხადოს საკუთარი აზრი და ჰქონდეს მაღალი წონა. 300-400 კაცი თუ აირჩევს, მაღალი წონა აღარ ექნება და გაქრება ძალთა ბალანსიდან. ხელისუფლება უნდა იყოს დაბალანსებული და ყველა შტოს უნდა ჰქონდეს საპირწონე. თუ გავაქრობთ პრეზიდენტის ინსტიტუტს, ბევრი საკითხი ბალანსიდან ამოგვივარდება. ეს არის რეალური პრობლემა. ხალხს და საზოგადოებას უნდა ჰქონდეს უფლება, თუნდაც პრეზიდენტის მეშვეობით დაუფიქსიროს პოზიცია ხელისუფლების სხვადასხვა შტოს. განსაკუთრებით მაშინ, როდესაც ხდება ძალაუფლების მეტი კონცენტრაცია. როდესაც პატივცემული კონსტიტუციონალისტები არჩევნებზე წასვლის უფლებას გართმევენ, ერთი სიტყვით მაინც უნდა გვითხრან, რით იქნება ეს ჩვენთვის უკეთესი. რაც უფრო მეტი არჩევითი თანამდებობებია, მით უფრო ახლოს არის ხელისუფლება ხალხთან", - განაცხადა გიორგი მარგველაშვილმა.
