ბელგიაში სამუშაო ვიზიტით მყოფი შინაგან საქმეთა მინისტრი გიორგი მღებრიშვილი ბრიუსელში, ანალიტიკურ ინსტიტუტს - „ევროპის პოლიტიკის ცენტრს“ (EPC) ეწვია და მრგვალი მაგიდის ფორმატში გამართულ შეხვედრაში მიიღო მონაწილეობა.
შეხვედრას საქართველოს შსს-ს დელეგაციის წევრები, ევროკომისიის, საელჩოების, საერთაშორისო და არასამთავრობო ორგანიზაციების წარმომადგენლები და ჟურნალისტები ესწრებოდნენ.
სიტყვით გამოსვლისას გიორგი მღებრიშვილმა დამსწრე საზოგადოებას საქართველოს შინაგან საქმეთა სამინისტროს მიერ ბოლო პერიოდში განხორციელებული რეფორმები გააცნო და ევროინტეგრაციის მიმართულებით მიღწეული პროგრესი შეაჯამა.
შს მინისტრმა ვიზალიბერალიზაციის სამოქმედო გეგმის იმპლემენტაციის პროცესში საქართველოს შსს-ს მიერ აღებული ვალდებულებების წარმატებით შესრულებაზე გაამახვილა ყურადღება. გიორგი მღებრიშვილმა ასევე ხაზი გაუსვა ევროპული ინსტიტუტების მხარდაჭერის განსაკუთრებულ მნიშვნელობას თავისუფალი სავიზო რეჟიმის ამოქმედების შემდგომ პერიოდშიც.
როგორც შს მინისტრმა აღნიშნა, ბოლო წლებში, ევროკავშირის სტანდარტებთან დაახლოების, ასევე, საქართველოს შსს-ს ეფექტიან და საზოგადოებაზე ორიენტირებულ უწყებად ჩამოყალიბების მიზნით, მნიშვნელოვანი საკანონმდებლო, სტრუქტურული და ფუნქციონალური რეფორმები გატარდა.
გიორგი მღებრიშვილმა სახელმწიფო საზღვრის ინტეგრირებული მართვის, დოკუმენტების უსაფრთხოების, არალეგალურ მიგრაციასთან ბრძოლის და პერსონალური მონაცემების დაცვის სტანდარტების დანერგვის მიმართულებით მიღწეულ პროგრესზე ისაუბრა, რომელიც ევროპელი ექსპერტების მიერ პოზიტიურად შეფასდა.
შს მინისტრმა ტრეფიკინგის წინააღმდეგ წარმატებით განხორციელებული ბრძოლის შედეგებიც შეაჯამა და აღნიშნა, რომ აშშ-ს სახელმწიფო დეპარტამენტის მიერ შეფასებული 176 სახელმწიფოდან საქართველო ადამიანით ვაჭრობის (ტრეფიკინგის) წინააღმდეგ მებრძოლი ქვეყნების შეფასების უმაღლეს საფეხურზე - ე.წ. „პირველ კალათაში“ მოხვდა.
გიორგი მღებრიშვილმა დამსწრე საზოგადოებას ასევე გააცნო შსს-ს პრევენციულ, დანაშაულზე რეაგირებისა და საგამოძიებო ფუნქციების გაძლიერების მიზნით განხორციელებული და დაგეგმილი პროექტები: კრიმინალური პოლიციის რეფორმა, ანალიზზე დაფუძნებული საპოლიციო საქმიანობა, მაღალტექნოლოგიური და მულტიფუნქციური ერთობლივი ოპერაციების ცენტრი და საზოგადოებაზე ორიენტირებული პოლიცია.
როგორც გიორგი მღებრიშვილმა შეხვედრაზე განაცხადა, საქართველოს შინაგან საქმეთა სამინისტროს ერთ-ერთ მნიშვნელოვან პრიორიტეტს ევროპის ქვეყნების სამართალდამცავ უწყებებთან ორმხრივი თანამშრომლობის გაძლიერება წარმოადგენს. მისი თქმით, დანაშაულის წინააღმდეგ ბრძოლაში თანამშრომლობის შესახებ შეთანხმება ქართულმა მხარემ უკვე გააფორმა ევროკავშირის 16 ქვეყანასთან, ხოლო 13 ქვეყანაში პოლიციის ატაშეები წარგზავნა.
შს მინისტრმა ასევე აღნიშნა, რომ უახლოეს მომავალში ხელი მოეწერება საქართველოსა და ევროპის პოლიციის სამსახურს შორის ოპერატიული და სტრატეგიული თანამშრომლობის შესახებ შეთანხმებას, რომლის ძალაში შესვლის შემდეგ საქართველო ევროპოლის ოპერატიული პარტნიორი ქვეყანა გახდება.
შეხვედრაზე გიორგი მღებრიშვილმა ანალიტიკოსებისა და ჟურნალისტების შეკითხვებს ამომწურავად უპასუხა. მან იმედი გამოთქვა, რომ „ევროპის პოლიტიკის ცენტრთან“ თანამშრომლობა საქართველოს შსს-ს ევროპულ თანამეგობრობასთან კიდევ უფრო მეტად დაახლოების შესაძლებლობას მისცემს. შს მინისტრმა შეხვედრის მონაწილეებს რეფორმების გაცვლის მრავალმხრივი პანელის შექმნა შესთავაზა და აღნიშნა, რომ აღნიშნულ ფორმატში განხორციელებული ერთობლივი ღონისძიებების საშუალებით პარტნიორი სახელმწიფოები ერთმანეთს საკუთარ მიღწევებს და საუკეთესო გამოცდილებას გაუზიარებენ.
