„რუსთავი 2“-ის თანამშრომლებმა ძმები ყარამანაშვილების შემოთავაზებას, 40%-იანი წილის თანამშრომლებისთვის გადაცემაზე, უარით უპასუხეს.გენერალურმა დირექტორმა, ნიკა გვარამიამ უარის მიზეზები განმარტა.
„ჩვენი უარი ემყარება შემდეგ გარემოებებს. პირველი, ამჟამად ყადაღის ქვეშ მყოფი 40 პროცენტიანი წილის რუსთავი 2-ის გუნდისთვის გადმოცემა პრაქტიკულად განუხორციელებადია, რამეთუ რუსთავი 2-ის წესდების თანახმად წილების გადაცემას ესაჭიროება ყველა მეწილის, მათ შორის, 9 პროცენტის წილის მეწილის, ნინო ნიჟარაძის, თანხმობა. ამგვარი თანხმობა არ არსებობს და შესაბამისად, წარმოდგენილი შემოთავაზება სამართლებრივი თვალსაზრისითაც წარმოადგენს ფიქციას. რაც, როგორც ჩანს, სამწუხაროდ, ძმებ ყრამანიშვილებს, გამორჩათ მხედველობიდან. მეორე, ამას გარდა რაც მთავარია, კომპანიის 40 პროცენტიანი წილის ფლობა პრაქტიკულად არ ცვლის საქმის ვითარებას, რამეთუ გადამწყვეტი ხმის უფლება ისევ რჩება ტელეკომპანია საქართველოს, რომელიც კომპანიის საკონტროლო პაკეტს, 51 პროცენტიან წილს ფლობს და ტელეკომპანია საქართველოს მესაკუთრეებიც არიან ძმები ყარამანიშვილები. შესაბამისად, შემოთავაზებული წინადადება შინაარსობრივი თვალსაზრისითაც ერთგვარად ფიქტიურია, რადგან კოლექტივისთვის კოლექტივის კომპანიის მართვაში ჩართულობის ვერანაირ გარანტიას ვერ ქმნის,“ - განაცხადა ნიკა გვარამიამ.
40%-იანი წილის ნაცვლად ნიკა გვარამიამ ძმებ ყარამანაშვილებს ტელეკომპანია „საქართველოს“ გადაცემა შესთავაზა, მისი თქმით, ეს ერთადერთი გამოსავალია არსებული ბარიერების მიმართ.
„სამაუწყებლო კომპანია რუსთავი 2-ის თანამშრომლები გამოვდივართ საპასუხო ინიციატივით. საკუთრებაში გადმოგვეცეს შპს ტელეკომპანია საქართველო, რაც როგორც სამართლებრივად, ისე შინაარსობრივად, ერთადერთი გზაა, კომპანიაში საქმის ვითარების რეალურად, და არა ფიქტიურად შესაცვლელად. შპს ტელეკომპანია საქართველო არ არის დაყადაღებული, მის გასხვისებას არ სჭირდება მესამე პირთა თანხმობა და ის ფლობს რუსთავი 2-ის საკონტროლო პაკეტს. მისი კოლექტივისთვის გამოცემით არა მხოლოდ ჩვენი ტელეკომპანიის, არამედ ქართული მედიის ისტორიაში პირველად, მაუწყებლის მესაკუთრეები გახდებიან თავად მისი თანამშრომლები. მათ მიერ საამისოდ შერჩეული და უფლებამოსილი პირების მეშვეობით, რომლებიც ანგარიშვალდებული იქნებიან სწორედ მათ წინაშე". - განაცხადა ნიკა გვარამიამ.