ჩვენი შეცდომები და დანაშაულები "ენჯეოებს" დააბრალო, რუსული სტილია, - ასე უპასუხა „ევროპული საქართველოს“ წევრმა ელენე ხოშტარიამ საქართველოს ყოფილ პრეზიდენტს მიხეილ სააკაშვილს, რომელმაც ქართული არასამთავრობოები მწვავედ გააკრიტიკა.
„რუსეთი რომ საქართველოს ძირს უთხრიდა და უთხრის ყველა შესაძლო ფორმებით, ამაში ახალი არაფერი არაა. რაც მეტი ფაქტი გამოვლინდება ამაზე უკეთესია. მაგრამ! შენი (ჩვენი) შეცდომები და დანაშაულები ეცადო რომ ამას დააბრალო და კიდე „ენჯოებს“ დაესხა თავს (რუსული სტილი სხვათა შორის) არის უკიდურესი არაკეთილსინდისიერება და პოლიტიკური უმწიფრობა“, - წერს ელენე ხოშტარია სოციალურ ქსელში.
შეგახსენებთ, აღნიშნულ თემაზე სააკაშვილმა პოსტი სოციალურ ქსელში დაწერა:
"მთელი მსოფლიო პრესა აჭრელდა ინფორმაციით, რომ 2005 წელს პუტინმა იქირავა ცნობილი ამერიკელი PR სპეციალისტი პოლ მანაფორტი და მას, სხვა საქმეებთან ერთად, დაავალა ჩემს წინააღმდეგ მუშაობა საქართველოში. ეს უკანასკნელი, თურმე, ქართულ არასამთავრობოებს იყენებდა. ახლა კი გასაგებია, თუ რატომ გვესხმოდა თავს მაშინ თითქმის ყველა არასამთავრობო და რატომ არ იღებენ ხმას დღევანდელ მარაზმზე. ფული ბაბაია, დიდი ფული (თან, ჰოი საკვირველებავ, რუსული).
რა თქმა უნდა, შორს ვარ იმ აზრისგან, რომ კორუფციაში დავადანაშაულო ყველა მაშინდელი არასამთავრობო ორგანიზაცია, მაგრამ ბევრი თავს იწყნარებდა იმით, რომ ფული, ფორმალურად, ამერიკული კერძო წყაროდან მოდიოდა, თუმცა, საბოლოო ჯამში, ეს რუსეთის მიზნებს ემსახურებოდა, ამაზე ახლა მაინც არის ღია დისკუსია და სიმართლის თქმა საჭირო!",- დაწერა სააკაშვილმა Facebook-ში.