დიდი ოდენობით ნარკოტიკული საშუალების შეძენა-შენახვის ფაქტზე, ლევან როსტოშვილსა და მსახიობ ლაშა კურტანიძეს 8 და 5 წლით თავისუფლების აღკვეთა მიესაჯათ.
ამის შესახებ საქალაქო სასამართლო განცხადებას ავრცელებს, რომელსაც უცვლელად გთავაზობთ:
„თბილისის საქალაქო სასამართლოს სისხლის სამართლის საქმეთა კოლეგიამ გამამტყუნებელი განაჩენი დაადგინა ნარკოდანაშაულისათვის ბრალდებულების ლევან რ.-სა და ლაშა კ.-ს მიმართ. მათ ბრალად ედებოდათ წინასწარი შეთანხმებით, ჯგუფის მიერ, განსაკუთრებით დიდი ოდენობით ნარკოტიკული საშუალების უკანონო შეძენა და შენახვა.
საქმის მასალების თანახმად, 2016 წლის 5 მაისს, ავტომანქანის ჩხრეკისას, რომლითაც ბრალდებულები გადაადგილდებოდნენ, ამოღებულ იქნა განსაკუთრებით დიდი ოდენობით ნარკოტიკული საშუალება, ხოლო დიდი ოდენობით ლაშა კ.-ს საცხოვრებელი სახლის ჩხრეკისას.
ღია სასამართლო სხდომებზე ბრალდებულებმა ისარგებლეს დუმილის უფლებით.
სასამართლომ, მოისმინა მხარეთა ახსნა-განმარტებები და სხდომებზე გამოკვლეულ მტკიცებულებათა ერთობლიობით, ლევან რ. და ლაშა კ. წინასწარი შეთანხმებით, ჯგუფის მიერ, ნარკოტიკული საშუალების უკანონო შეძენა/შენახვისათვის წარდგენილ ბრალდებაში გაამართლა.
ლევან რ. დამნაშავედ იქნა ცნობილი განსაკუთრებით დიდი ოდენობით ნარკოტიკული საშუალების უკანონო შეძენა/შენახვისათვის და სასჯელის სახედ და ზომად 8 წლით თავისუფლების აღკვეთა მიესაჯა.
ბრალდებულ ლაშა კ.-ს, მის მიმართ წარდგენილი ბრალდება - განსაკუთრებით დიდი ოდენობით ნარკოტიკული საშუალების უკანონო შეძენა / შენახვის მუხლი, გადაკვალიფიცირდა დიდი ოდენობით ნარკოტიკული საშუალების უკანონო შეძენა/შენახვის ბრალდებაზე, შედეგად სასამართლომ ლაშა კ.-ს სასჯელის სახედ და ზომად 5 წლით თავისუფლების აღკვეთა მიუსაჯა.
სასამართლოს აღნიშნული განაჩენი შეიძლება გასაჩივრდეს გამოცხადებიდან ერთი თვის ვადაში, თბილისის სააპელაციო სასამართლოს სისხლის სამართლის საქმეთა პალატაში“, - აღნიშნულია თბილისის საქალაქო სასამართლოს მიერ გავრცელებულ განცხადებაში.
როსტოშვილი და კურტანიძე 2016 წლის 5 მაისში დააკავეს. ექპერტიზის დასკვნით, მათ 42.9524 გრამი ნარკოტიკული საშუალება MDMA და ექსტაზი აღმოაჩნდათ.
