საკონსტიტუციო კომისიამ მუშაობა აპრილის ბოლოს უნდა დაასრულოს, თუმცა ომბუდსმენი მიიჩნევს, რომ ასეთი ტემპით ქვეყნის განვითარებისთვის სასიკეთო შედეგი მიღებული ვერ იქნება. სახალხო დამცველის შეფასებით, სამწუხარო და საგანგაშოა, რომ კომისიის მუშაობა ძალიან შემჭიდროებულ ვადებში მიმდინარეობს.
” საუბარი არის ქვეყნის ძირითად კანონზე, რომლის შექმნაში და ცვლილებებში მაქსიმალურად მეტი ადამიანი უნდა იყოს ჩართული. მრჩება შთაბეჭდილება, თითქოს დაჩქარებული და ფორსირებული ტემპით ხდება გარკვეული ცვლილების მიღება და შემდგომ ამ ცვლილების პარლამენტის მიერ დამტკიცება - იქიდან გამომდინარე, რომ არსებობს გარკვეული შესაძლებლობა, საკონსტიტუციო უმრავლესობამ გაიტანოს ცვლილებები, რომელიც მმართველი პარტიისთვის ხელსაყრელია. ამიტომ, ჩვენი რეკომენდაციაა, პროცესი რაც შეიძლება მეტად გაგრძელდეს, დიდი ხნის განმავლობაში დროში. ჩვენ არსად გვეჩქარება, რომ მაინცდამაინც აპრილის ან თუნდაც მაისის ბოლოს იყოს კონკრეტული წინადადებები”, - აცხადებს ნანუაშვილმა.
მისი თქმით, ასევე მნიშვენლოვანია საერთაშორისო და ადგილობრივი ექსპერტების, ვენეციის კომისიის და სხვა ორგანიზაციების ჩართულობა, რადგან ეს არ არის დოკუმენტი, ”რასაც ყოველწლიურად შევცვლით”. სახალხო დამცველის განცხადებით, კონსტიტუცია წლების განმავლობაში უნდა იყოს ქვეყნის მთავარი კანონი.
