23 მარტს, 12:00 საათზე, აჭარის ა/რ მთავრობის, უმაღლესი საბჭოს, ბათუმის მერიისა და საკრებულოს წევრები, საქართველოს ერთიანობისთვის დაღუპულ გმირთა სკვერში (ი.ჭავჭავაძის სახელობის დრამატული თეატრის უკან - ძველი ბათუმი) შეიკრიბებიან და მემორიალურ ქვას გვირგვინებითა და ყვავილებით შეამკობენ.
ღონისძიების დასასრულს დეკანოზი თევდორე ახალაძე დაღუპულთა სულების მოსახსენიებელ პანაშვიდს გადაიხდის. 1921 წლის მარტს, საქართველოს გასაბჭოება განხორციელდა, რის შემდეგაც, თურქეთის საჯარისო ნაწილებმა ბათუმის ოლქი დაიკავეს. ქართველმა გენერალმა გიორგი მაზნიაშვილმა თურქეთის საჯარისო ნაწილების მიერ დაკავებული ბათუმი გაათავისუფლა.
თავისუფლებისთვის ბრძოლაში 1921 წლის მარტში 50 იუნკერი დაიღუპა, მათ შორის ერთი ქალბატონი იყო. იუნკერების საფლავის ძიება და გათხრები 1990 წლის მაისში დაიწყო. ათკაციანი ჯგუფი ქალაქის ცენტრალურ მოედანზე ერთი თვის განმავლობაში მუშაობდა.
გათხრების შედეგად აღმოჩენილია საბრძოლო იარაღი, ნივთები და გარდაცვლილთა ცხედრები. ნაწილის გადასვენება საქართველოს სხვადასხვა რეგიონში მალევე მოხდა. 50-დან მხოლოდ 27 იუნკერის ვინაობის დადგენა მოხერხდა.ბათუმის გათავისუფლებისთვის ბრძოლაში დაღუპულ მებრძოლთა დღე ყოველი წლის 23 მარტს აღინიშნება.