ომბუდსმენი პოლიტიკურად აქტიური პირების ოჯახის წევრების დაკავების ფაქტებს საეჭვოდ მიიჩნევს. უჩა ნანუაშვილის განცხადებით, “ქრონიკა პლიუსის” მთავარი რედაქტორის ელისო კილაძის შვილს სხეულზე დაზიანებები აღენიშნება, რაც გამოძიების დაწყების საფუძველს იძლევა.
,,დავით ხარშილაძის დაკავების დროს, ძალის გადატემება მოხდა თუ არა და ეს დაზიანებები რისგან წარმოიშვა - შსს-მ რეაგირება უნდა მოახდინოს. შსს-ს შესაბამისი რეკომენდაციით გუშინ უკვე მივმართეთ, რომ კონკრეტული პოლიცილეების მიმართ დისციპლინური წარმოება დაიწყოს“, - აღნიშნა სახალხო დამცველმა.
რაც შეეხება „ნაციონალური მოძრაობის“ წარმომადგენლის, უკრაინის ეროვნული პოლიციის ყოფილი ხელმძღვანელის ხატია დეკანოიძის შვილის დაკავების ფაქტს, ომბუდსმენის თქმით, საეჭვოა, რომ პოლიტიკურად აქტიური პირების ოჯახის წევრების მიმართ, დროის ასეთ მონაკვეთში მსგავსი ქმედებები ხდება.
,,ამ საქმის მოკვლევას და შესწავლასაც ვიწყებთ იმიტომ, რომ, ცოტა არ იყოს საეჭვოა, რომ პოლიტიკურად აქტიური პირების და მათი ოჯახის წევრების მიმართ, დროის ასეთ მონაკვეთში ასეთი ქმედებების განხორციელება ხდება“, - განაცხადა უჩა ნანუაშვილმა.
დავით ხარშილაძე ნარკოდანაშაულის ბრალდებით დააკავეს და თბილისის საქალაქო სასამარლთლომ აღკვეთის ღონისძიების სახით, პატიმრობა შეუფარდა. ასევე, ხატია დეკანოიძის შვილი, თორნიკე კოპალეიშვილიც, ნარკოდანაშაულის ბრალდებით დააკავეს და აღკვეთის ღონისძიების სახედ პატიმრობა შეეფარდა.