„ის პოზიცია, რომელიც იყო გამოთქმული ერთგვარი რევიზირება სტრასბურგის გადაწყვეტილების, მე ვფიქრობ, რომ უზომოდ დამაზიანებელია ქართული სახელმწიფო ევროპული და ევროატლანტიკური არჩევანისათვის,“ - განაცხადა საქართველოს პრეზიდენტის მრჩეველმა პოლიტიკურ საკითხებში, ფიქრია ჩიხრაძემ, მმართველი გუნდის მხრიდან ,,რუსთავი 2“ -ის საკითხზე გაკეთებულ განცხადებებთან დაკავშირებით.

ის მმართველი გუნდის წარმომადგენლებს ურჩევს, აღნიშნულ თემაზე განცხადებების გაკეთებისგან თავი შეიკავონ, სანამ სტრასბურგის სასამართლო საქმეს არსებითად არ განიხილავს, რათა საქართველოს იმიჯი მთავრობის უპასუხისმგებლო გამონათქვამებით არ დაზიანდეს.

„ვურჩევთ ყველას, აღმასრულებელი ხელისუფლების თუ საპარლამენტო უმრავლესობის წარმომადგენლებს, რომ ამგვარი განცხადებების გაკეთება ძალიან დამაზიანებელია ისედაც უკვე კითხვისნიშნებ დასმულ პროცესთან დაკავშირებით,“ - განაცხადა ფიქრია ჩიხრაძემ ,,კურიერთან „ საუბარში

ის აღნიშნავს, რომ სტრასბურგის სასამართლოს გადაწყვეტილებები ეჭვის ქვეშ არცერთ ხელისუფლებას არ დაუყენებია და დღევანდელი ხელისუფლების რეაქციაც ადეკვატური უნდა იყოს. 

ფიქრია ჩიხრაძე აცხადებს, რომ ,,რუსთავი 2“ -ის საქმეზე ხელისუფლებამ საკონსტიტუციო სასამართლოს არ უნდა მიმართოს, რადგან ეს რუსული პრაქტიკის გამეორება იქნება, რაც საქართველოს ევროპულ ინტერესებს ეწინააღმდეგება.