„გამოხატვის თავისუფლებისთვის ბრძოლა ახლა იწყება, თუ აქამდე ხელისუფლების პოზიცია იყო, რომ, თითქოს, ეს იყო დავა 2 პირს შორის, ახლა ფორმალურად ხელისუფლება არის მხარე ამ პროცესში,“ - ეს განცხადება იურისტმა და საერთაშორისო სამართლის სპეციალისტმა, დავით ჯანდიერმა, რუსთავი2-ის საქმეზე გააკეთა.
ჯანდიერის თქმით, საქართველოში სასამართლო ხელისუფლება არის ძალიან სუსტი და არ არის დამოუკიდებელი.
იურისტის განცხადებით, იმაზე აპელირება, რომ ეს არის საქმე რუსთავი2 საქართველოს წინააღმდეგ, არის „უცოდინარობა ან მოსახლეობის შეცდომაში შეყვანას ისახავს მიზნად".
დავით ჯანდიერი პრემიერის წერილსაც გამოეხმაურა, რომელმაც მან ევროპარლამენტარებს მათსავე წერილზე საპასუხოდ გაუგზავნა. მან აღნიშნა, რომ რუსთავი2-ის საქმემ მიიღო საერთაშორისო რეზონანსი, საქართველო უნდა იყოს დამოკიდებული თავის პარტნიორებზე.
„ყველაზე მთავარია, რაც ხელისუფლებამ უნდა გააკეთოს, გონიერების ვალდებულება აქვს, ვერ დავინახე, რომ ხელისუფლება შესაბამისი სიფრთხილით, ყურადღებით უყურებს იმ გზავნილებს, რომელიც ევროპული ქვეყნებისგან მოდის. ერთადერთი გამოსავალი ახლა არის სიდინჯე, ხელისუფლებამ როგორღაც მოახერხო რუსთავი 2-თან მორიგება, მხარეს შეუძლია მორიგება განახორციელოს, იმიტომ, რომ სტრასბურგის კონვენცია ამის შესაძლებლობას იძლევა,“- განაცხადა ჯანდიერმა.
