ე.წ.მოსმენების კანონთან დაკავშირებით, „საერთაშორისო გამჭვირვალობა - საქართველო“ სარჩელს შეიტანს როგორც სტრასბურგის სასამართლოში, ასევე საქართველოს საკონსტიტუციო სასამართლოში, - ამის შეესახებ „საერთაშორისო გამჭვირვალობა - საქართველოს“ აღმასრულებელმა დირექტორმა ეკა გიგაურმა განაცხადა. მისივე თქმით, მიესალმებიან, თუკი პრეზიდენტი აღნიშნულ კანონთან დაკავშირებით ვეტოს უფლებას გამოიყენებს.
ეკა გიგაურის შეფასებით, აღნიშნულ საკითხზე პრეზიდენტის მიერ დაგეგმილი კონსულტაციები მისასალმებელია.
,,ე.წ. მოსმენების კანონი, მიღებულია თითქმის ერთპიროვნულად - „ქართული ოცნების“ მიერ. არც საქართველოს პრეზიდენტი, არც ოპოზიციური პარტიები და არც ადგილობრივი არასამთავრობო ორგანიზაციები ამ მოდელს მხარს არ უჭერდნენ. შესაბამისად, ჩვენს შორის დისკუსია ამ მიმართულებით ვერ შედგა. აქედან გამომდინარე, დამატებით კონსულტაციები არის მნიშვნელოვანი და ჩვენ, რა თქმა უნდა, მივესალმებით თუ პრეზიდენტი გამოიყენებს ვეტოს უფლებას. ჩვენი მხრიდან ცხადია, შევიტანთ სარჩელს სტრასბურგში. ეს არის მექანიზმი, რომელსაც ჩვენ გამოვიყენებთ და ასევე ჩვენ შევიტანთ სარჩელს საკონსტიტუციო სასამართლოში”, - განაცხადა ეკა გიგაურმა.