რუსთავი2-ის მხარდამჭერ აქციაზე კურიერის წამყვანმა, დიანა ჯოჯუამ, აქციაზე მოსულებს მადლობა გადაუხადა. მისი თქმით, აქციის მონაწილეები არა მხოლოდ რუსთავი2-ს, არამედ ქვეყნის მომავლს იცავენ.
„უზენაესი სასამართლოს გადაწყვეტილებაზეა დამოკიდებული, რა იქნება ხვალ. გავიღვიძებთ სახელმწიფოში, რომელსაც სურს დემოკრატიულ საზოგადოებაში ცხოვრება, თუ იმ სახელმწიფოში, სადაც ავტოკრატია იქნება გამეფებული. ევროპული არჩევანი, რომელითაც დღეს ხელისუფლება იწონებს თავს, ამ დროისთვის, სამწუხაროდ, მხოლოდ ცარიელი სიტყვებია, ისევე, როგორც ყველაფერი, რასაც ის აკეთებს, რადგან ევროპული არჩევანი, უპირველეს ყოვლისა, გულისხმობს დემოკრატიის მაღალ ხარისხს, რომელიც მედიის დამოუკიდებლობის და თავისუფლების გარეშე წარმოუდგენელია,“ - განუცხადა დიანა ჯოჯუამ აქციის მონაწილეებს.
მან ასევე აღნიშნა, რომ რუსთავი2-ის თანამშრომლები უკვე მიჩვეულები არიან ბრძოლას და არც ამჯერად დაიხევენ უკან.
„ჩვენ შეჩვეულები ვართ ბრძოლას, ვიბრძვით უკვე ძალიან დიდი ხანია და არ დავიღლებით, მაგრამ დადგა დრო, როდესაც თავისი სიტყვა და გადამწყვეტი სიტყვა უნდა თქვათ თქვენ და უნდა თქვას საზოგადოებამ,“ - განაცხადა დიანა ჯოჯუამ.
