სერგეი ლავროვმა რუსეთის მიერ საქართველოსთან სავიზო რეჟიმის გაუქმების პირობებზე ისაუბრა. რუსეთის საგარეო უწყების ხელმძღვანელის თქმით, ამისთვის ორი ქვეყნის სამართალდამცავ ორგანოებს შორის თანამშრომლობა უნდა აღდგეს. საინფორმაციო სააგენტოების ცნობით, განცხადება ლავროვმა მიუნხენში გააკეთა.
დიპლომატი ამბობს, რომ საქართველოსთან უვიზო რეჟიმის დაწესების განხილვა დიპლომატიური ურთიერთობების გარეშე უცნაურია. „მაგრამ ეს ასევე დაკავშირებულია უსაფრთხოების საკითხებთან. არა მხოლოდ ცენტრალური აზია, არამედ ამიერკავკასია ხდება მარშრუტი, რომლის გამოყენებას ბოევიკები და ექსტრემისტები ცდილობენ“, - აღნიშნა ლავროვმა.
რუსეთის საგარეო საქმეთა მინისტრის თქმით, ქვეყნებს შორის იზრდება ტვირთბრუნვა, ავიარეისების რაოდენობა, საქართველოს მოქალაქეებს კი რუსეთში ჩასვლა „პრაქტიკულად ნებისმიერი საბაბით შეუძლიათ“.
მოსკოვში საქართველოსთან უვიზო რეჟიმის ამოქმედებაზე ბოლო პერიოდში რამდენიმე განცხადება გაკეთდა. შარშან დეკემბერში ამაზე ვლადიმერ პუტინმა ისაუბრა, რომლის განცხადებით, თბილისის მხრიდან გარკვეული სიგნალები შეინიშნება.