ტყიბულში საცხოვრებელ სახლში გაჩენილი ხანძრის შედეგად მამაკაცი გარდაიცვალა. საზოგადოებრივი მაუწყებლის ინფორმაციით, შემთხვევა გუშინ მოხდა, სახანძრო ბრიგადა გამოძახების ადგილზე დროულად მივიდა, თუმცა მამაკაცი გარდაცვლილი დახვდათ. შემთხვევის ადგილზე შვიდი მანქანა მუშაობდა.
როგორც საზოგადოებრივს შინაგან საქმეთა სამინისტროში განუცხადეს, გამოძიება სისხლის სამართლის კოდექსის 188-ე მუხლით დაიწყო, რაც გულისხმობს სხვისი ნივთის დაზიანებას ან განადგურებას გაუფრთხილებლობით, რამაც მნიშვნელოვანი ზიანი გამოიწვია.
კანონის მიხედვით, თუ იგივე ქმედება ჩადენილია ცეცხლთან ან მომეტებული საფრთხის წყაროსთან გაუფრთხილებელი მოპყრობით, რამაც გამოიწვია ადამიანის სიცოცხლის მოსპობა ან სხვა მძიმე შედეგი, ისჯება თავისუფლების აღკვეთით ვადით სამიდან ხუთ წლამდე.