„ორი დღის წინ მოგვატყუეს, ახლა ცდილობენ, დაგვაჯერონ, რომ რაც ვთქვით, თურმე ის არ ყოფილა, რაც ვთქვითო. რაც არ არის მხოლოდ პროკურატურის საქმე, ეს ხელისუფლების პასუხისმგებლობაა“, - განაცხადა „ევროპული საქართველოს“ წევრმა, სერგო რატიანმა დეკანოზ გიორგი მამალაძის საქმესთან დაკავშირებით.
მისივე თქმით, ხელისუფლება იცავს პროკურატურას, რომელსაც აღარავინ ენდობა.
„ოთხი წლის განმავლობაში ვხედავ პროკურატურის მხრიდან ძალიან მძიმე დანაშაულებს და ძალიან მძიმე ცილისწამებებს. ბევრი საქმე არ არის გახსნილი. მე შეგახსენებთ რაფალიანცის, თათუხაშვილის და კიწმარიშვილის საქმეებს. ეს პირველ შემთხვევაში იყო ცილისწამება იმ ფონზე, როცა საქმე გამოძიებული არ იყო, მეორე შემთხვევაში ადამიანია გარდაცვლილი და მესამე შემთხვევაში გამოძიება არასწორი მიმართულებით მიმდინარეობს. ჩვენ არაერთხელ მოგვითხოვია, რომ სამივე ამ საქმეზე შექმნილიყო საგამოძიებო ჯგუფი, თუმცა ეს არ მოხდა, ვინაიდან ხელისუფლება იცავს პროკურატურას, რომელსაც აღარავინ ენდობა“, - განაცხადა სერგო რატიანმა.
მთავარი პროკურატურა დეკანოზ გიორგი მამალაძის საქმესთან დაკავშირებით აცხადებს, რომ მედიასაშუალებებმა პროკურატურის განცხადების ინტერპრეტაცია მოახდინა.