ნაციონალური მოძრაობის წევრის ხატია დეკანოიძის თქმით, ზაქარია ქუცნაშვილმა პირდაპირ აღიარა, რომ საქართველოს ხელისუფლება რუსეთის სპეცსამსახურებთან თანამშრომლობს.
„ღალატთან გვაქვს საქმე, ძალიან მარტივი ფორმულირება შეიძლება მოვუძებნოთ ჩვენ ზაქარია ქუცნაშვილის განცხადებას, რომელმაც პირდაპირ აღიარა, აღიარებითი ჩვენება მისცა, რომ საქართველოს ხელისუფლება, საქართველოს სპეცსამსახურები თანამშრომლობენ რუსეთის სპეცსამსახურებთან, რომ საქართველოს ხელისუფლებამ, სპეცსამსახურებმა გადასცეს მთელი მონაცემთა ბაზა იმ ქართველი სამხედროების, იმ ადამიანების შესახებ, რომლებიც უშუალოდ მონაწილეობდნენ 2008 წლის რუსეთ-საქართველოს ომში,“ - აცხადებს ხატია დეკანოიძე.
ხატია დეკანოიძის თქმით, აღარავინ იეჭვებს, რომ საქართველოს ხელისუფლება რუსეთის სპეცსამსახურებზეა მიბმული. მისი თქმით, შინაგან საქმეთა სამინისტროს და პროკურატურის განცხადება „სამარცხვინოა.“
„ერთხელ და სამუდამოდ უნდა დასრულდეს ადამიანების გაბითურება იმასთან დაკავშირებით, რომ რუსეთი აქ არაფერ შუაშია. პირდაპირ, ბიძინა ივანიშვილის ხელისუფლება ხელდასხმულია რუსეთისგან, ეს აშკარად გამოჩნდა ახლა აქ,“ - აცხადებს ხატია დეკანოიძე.
ნაციონალური მოძრაობის წევრი აღნიშნავს, რომ საქართველოს მთავრობამ საკუთარი სამხედროები გადაცემის ნაცვლად უნდა დაიცვას.
ხატია დეკანოიძე იმედოვნებს, რომ უკრაინის სასამართლო გიორგი ცერცვაძეს არ გადაცემს რუსულ სპეცსამსახურებს.
