სასტუმრო „თბილისი რუმსში“ საქართველოს სავაჭრო-სამრეწველო პალატის საბჭოს სხდომა გაიმართა, რომელიც პალატის პრეზიდენტმა-ნინო ჩიქოვანმა და ევროინტეგრაციის საკითხებში სახელმწიფო მინისტრმა- ვიქტორ დოლიძემ გახსნეს.
ღონისძიებას პალატის საბჭოს წევრი ბიზნეზ-ასოციაციები და დიპლომატიური კორპუსის წარმომადგენლები ესწრებოდნენ. საქართველოს სავაჭრო-სამრეწველო პალატამ მათ 2016 წელს განხორციელებული პროექტების ანგარიში წარუდგინა.
საქართველოს სავაჭრო-სამრეწველო პალატამ 2016 წლის განმავლობაში რამდენიმე პროექტი განახორციელა. განსაკუთრებული აქცენტი ევროპასთან ღრმა დაყოვლისმომცველი თავისუფალი ვაჭრობის შესახებ ცნობადობის ამაღლებასა და რეგიონული მცირე და საშუალო ბიზნესის ხელშეწყობაზე გაკეთდა.
”პრიორიტეტები არის რეგიონული მცირე და საშუალო მეწარმეებთან ღია დიალოგი, მათი პრობლემატიკის მოსმენა, მათთვის პალატის სერვისების მიწოდება, ასევე, ამ კუთხით თანამშრომლობა, როგორც ევროკავშირის წევრი ქვეყნების საელჩოების ეკონომიკური ატაშეების წარმომადგენლებთან, ასევე ევროინეტეგრაციის სამინისტროსთან, დონორებთან და იმ ასოციაციებთან, რომლებიც გაერთიანებული არიან პალატის საბჭოში”, - განაცხადა ნინო ჩიქოვანმა.
წლის ერთ-ერთი ყველაზე მასშტაბური პროგრამა იყო „ღია დიალოგი ბიზნესთან“, რომლის ფარგლებშიც საქართველოს სავაჭრო-სამრეწველო პალატის გუნდმა საქართველოს ყველა რეგიონში ბიზნეს-სექტორთან შეხვედრები გამართა და მათი პრობლემები მოისმინა. პრობლემატური საკითხების შეკრების შემდეგ საჭიროებისამებრ გაიმართა ხელმეორე შეხვედრები სახელმწიფო უწყებებისა და საერთაშორისო ორგანიზაციების ჩართულობით. გარდა ამისა, პროექტის შემაჯამებელი ღონისძიება გაიმართა თბილისში, სადაც რეგიონებიდან ჩამოსულ 270 მეწარმეს საშუალება ჰქონდა პირდაპირი დიალოგის რეჟიმში საკუთარი პრობლემების შესახებ მთავრობის წარმომადგენლებთან ესაუბრა.
DCFTA-ს შესახებ ცნობადობის ამაღლების მიზნით პალატამ დონორ ორგანიზაციებთან ერთად შეიმუშავა პროექტი და გახსნა DCFTA-საინფორმაციო ცენტრები საქართველოს 5 ქალაქში (თბილისი, ზუგდიდი, ქუთაისი, გორი, სიღნაღი), რომლებიც ამჯერად სატესტო რეჟიმში მუშაობენ.
”განსაკუთრებით აღვნიშნავდი პალატის წვლილს ჩვენი მოქალაქეებისთვის რეგიონებში, ბიზნესმენებისთვის ინფორმაციიის მიწოდების და ცნობიერების ამაღლების თვალსაზრისით. დღეს აქ იმიტომ ვიმყოფები, რომ ერთობლივი ღონისძიებები გავაკეთოთ სავაჭრო პალატასთან თანამშრომლობით”, - განაცახდა სახელმწიფო მინისტრმა ევროინტეგრაციის საკითხებში- ვიქტორ დოლიძემ.
ღონისძიების მეორე ნაწილში საქართველოს სავაჭრო-სამრეწველო პალატამ დიპლომატიურ კორპუსს, საბჭოსა და სხვა მოწვეულ სტუმრებს მიუნხენისა და ზემო ბავარიის სავაჭრო პალატასთან საპარტნიორო პროექტის ერთი წლის შედეგებიც წარუდგინა.