„როდესაც რუსეთს რაღაც უხარია და დათმობებზე ლაპარაკობს, მთავარია, ეს დათმობები არ მოხდეს საქართველოს სუვერენიტეტის და საქართველოს სახელმწიფო ხარჯზე”, - განაცხადა „თავისუფალი დემოკრატების“ ერთ-ერთმა ლიდერმა ნინო გოგუაძემ აბაშიძე-კარასინის შეხვედრის შესახებ გავრცელებულ ინფორმაციასთან დაკავშირებით.
გოგუაძე მიიჩნევს, რომ რუსეთის ხელისუფლების ნებისმიერ განცხადებასთან ფრთხილი დამოკიდებულებაა საჭირო.
,,ძალიან სიფრთხილით ვუყურებ ამ განცხადებას და დაველოდები როგორი პასუხი ექნება საგარეო საქმეთა სამინისტროს და საქართველოს მთავრობას, ეს ძალიან საფრთხილო პროცესია, რომელსაც ძალიან მკაფიოდ დავაკვირდებით“, - დასძინა ნინო გოგუაძემ.
რუსეთის საგარეო საქმეთა სამინისტრომ დღეს გაავრცელა ინფორმაცია, სადაც საუბარია იმაზე, რომ თბილისში შესაძლოა, ქართველი და რუსი ბიზნესმენების შეხვედრა გაიმართოს. ამასთან, რუსეთის მთავრობა ქართული ავიახაზების საჰაერო ხომალდების ეკიპაჟებისთვის სავიზო რეჟიმის გამარტივების საკითხის განიხილავს.