აჭარის მთავრობის თავმჯდომარე ზურაბ პატარაძე ბათუმის დრამატული თეატრის მსახიობებს შეხვდა.
შეხვედრა "მცირე სცენის" დარბაზში გაიმართა. ზურაბ პატარაძემ აღნიშნა, რომ მას შედეგ რაც საქართველოში დაბრუნდა და რეგიონის ხელმძღვანელი გახდა, მუდმივ კომუნიკაციაშია საზოგადოებასთან, ხალხთან, მოიარა არა მარტო ბათუმის ქუჩები, არამედ მთელი მაღალმთიანი აჭარა და გაეცნო რეგიონში არსებულ თითქმის ყველა ძირეულ და მნიშვნელოვან პრობლემას. თეატრის მსახიობებთან შეხვედრის მიზანიც სწორედ მათ წინაშე მდგარი გამოწვევების ახლოს გაცნობა იყო.
მთავრობის თავმჯდომარემ მსახიობებთან ისაუბრა იმ სიახლეებზე და პროექტებზე, რომელთა განხორციელებაც უახლოეს მომავალში იგეგმება. ზურაბ პატარაძემ განსაკუთრებული ხაზი გაუსვა კულტურის სფეროს განვითარებას, რომლის განუყოფელ ნაწილსაც თეატრალური სამყარო წარმოადგენს.
"მიხარია, რომ ბათუმის დრამატული თეატრი არის ერთ-ერთი ყველაზე ისტორიული, გამორჩეული და დიდი ტრადიციების მატარებელი საქართველოში. იგი არის ნამდვილი სავიზიტო ბარათი რეგიონში ჩამოსული ტურისტებისათვის, უფრო მეტიც, აჭარამ უკვე დაიმკვიდრა თავი, როგორც საერთაშორისო კინოს, მუსიკის, ფოლკლორის ცენტრმა, ასევე საერთაშორისო ბიზნეს-ფორუმების, საქმიანი შეხვედრების, გამოფენების ქალაქმა. მჯერა, სულ მალე, ბათუმი თეატრალური ფესტივალის მასპინძელიც გახდება. ამ იდეაზე უკვე მუშაობს განათლების, კულტურისა და სპორტის სამინისტრო. საერთაშორისო დონის თეატრალური ფესტივალი კიდევ უფრო გაზრდის ჩვენი ქალაქის და რეგიონის ცნობადობას მსოფლიოში. ამისათვის ჩვენ ყველა რესურსს ვფლობთ: კაპიტალური რეაბილიტაცია უტარდება ბათუმის დრამატულ თეატრის შენობას, რომლის დასრულების შემდეგ თეატრში იქნება თანამედროვე სტანდარტების შესაბამისი ყველა პირობა, ჩვენ გვყავს საუკეთესო თეატრალური დასი"-აღნიშნა მთავრობის თავმჯდომარემ.
თავმჯდომარის მიერ რეგიონის განვითარებისა და კულტურის მიმართულებით ხედვების გაზიარების შემდეგ, მსახიობებმა ზურაბ პატარაძეს შეკითხვები დაუსვეს. შეხვედრა დისკუსიის ფორმატით გაგრძელდა.
