კამპანია „გაიცანი საქართველო“-ს ფარგლებში ეკონომიკისა და მდგრადი განვითარების სამინისტროს ტურიზმის ეროვნულმა ადმინისტრაციამ რიგით მე-16 პრესტური სამეგრელო ზემო-სვანეთის მხარეში გამართა. სხვადასხვა მედიასაშუალებების 20-მდე წარმომადგენელმა ტობა ვარჩხილის ტბა მოინახულა.
ტობავარჩხილი ჩხოროწყუს მუნიციპალიტეტში, ეგრისის ქედზე, ზღვის დონიდან 2650 მეტრზე მდებარეობს. ტბის უდიდესი სიღრმე 35 მეტრია. საზრდოობს თოვლის, წვიმისა და მიწისქვეშა წყლით. წყლის დონე დაბალია ზამთარში, მაღალია — ივლისში. ტობავარჩხილი, (ვერცხლის ტბა) მთის გამჭირვალე ტბის საერთო სახელია ეგრისის ქედზე, სადაც აღნიშნული სახელწოდების 6 ტბაა აღრიცხული.
ტობავარჩხილის მონახულების შემდეგ პრესტურის მონაწილეები კოლხეთის ეროვნულ პარკს ეწვივნენ. დაათვალიერეს ვიზიტორთა ცენტრის საგამოფენო დარბაზი, სადაც პარკის მნიშვნელობისა და ღირსშესანიშნაობის შესახებ მოკლე პრეზენტაცია გაიმართა. ამის შემდეგ ჟურნალისტებმა პალიასტომის ტბაში ნავებით გაისეირნეს, პატარა პალიასტომსა და მდინარე ფიჩორზე დაათვალიერეს ფრინველების სათვალთვალო კოშკურები.
პრესტურის მეორე დღეს მედიის წარმომადგენლებმა მარტვილის მუზეუმი, ჭყონდიდის მონასტერი და კაღუს ჩანჩქერი მოინახულეს, ეწვივნენ ეთნოსახლს, დააგემოვნეს ადგილობრივი კერძები.
შიდა ტურიზმის პოპულარიზაციის მიზნით, ტურიზმის ეროვნულმა ადმინისტრაციამ კამპანია „გაიცანი საქართველო“ 2015 წელს დაიწყო. პროექტის მიზანია საქართველოს ტურისტული პოტენციალის წარმოჩენა და შიდა ტურიზმის პოპულარიზაცია. ერთი წლის განმავლობაში მასმედიის 200-მდე წარმომადგენელმა საქართველოს სხვადასხვა რეგიონი მოინახულა. მომზადდა 70-ზე მეტი სიუჟეტი, მთელი წლის მანძილზე ქართული საზოგადოება იღებდა ინფორმაციას საქართველოს სხვადასხვა კუთხის ტურისტული პოტენციალისა და ღირშესანიშნაობების შესახებ.
ტურიზმის ეროვნული ადმინისტრაცია მადლობას უხდის საქართველოს შინაგან საქმეთა სამინისტროს და მის დაქვემდებარებაში შემავალ საქართველოს სასაზღვრო პოლიციას ვერტმფრენის გამოყოფისათვის.