სახელმწიფო უსაფრთხოებისა და კრიზისების მართვის საბჭოს ხელმძღვანელის, მინდია ჯანელიძის მტკიცებით, იმ ობიექტს, რომელზეც ტრისტან წითელაშვილი იმყოფებოდა, საიდუმლო სტატუსი არ ჰქონია. თავდაცვის ყოფილი მინისტრი აცხადებს, რომ
”ვინც ამ ინფორმაციას ავრცელებს, ან არ იცის რომ ამ ობიექტს არ ჰქონია საიდუმლო სტატუსი, ან შეგნებულად იტყუება“.
,,იმ ობიექტს, სადაც დარღვევა მოხდა, არ ჰქონია საიდუმლო სტატუსი. რაც შეეხება დარღვევაზე რეაგირებას, ეს ერთ დღეში არ ხდება. ჩემი მინისტრობის დროს, გენერალურმა ინსპექციამ დაიწყო მოკვლევა და დავუტოვეთ დასკვნა მომავალ მინისტრს, რაზე დაყრდნობითაც მიიღო გადაწყვეტილებები”, - განაცხადა ჯანელიძემ.
მისივე თქმით, დაირღვა სარეჟიმო წესები, რასაც შესაბამისი სამართლებრივი გარემოება აქვს.
”ეს შემთხვევა არის სარეჟიმო წესების დარღვევა, რასაც შესაბამისი სამართლებრივი რეაგირება აქვს, რომელიც მოხდა. არ ვიყავით ვალდებული, რომ კანონით დადგენილზე მეტით გვეცნობებინა ვინმესთვის ეს ინფორმაციები. ეს ყველაფერი არის აბსურდის თეატრი, პოლიტიკურ პროვოკაციაზე დაფუძნებული ფაქტი და ამის შესახებ მეტ კომენტარს აღარ გავაკეთებ”, - განაცხადა მინდია ჯანელიძემ.
შეგახსენებთ, რომ ყოფილი თავდაცვის მინისტრი თინა ხიდაშელი საიდუმლო ობიექტებზე წითელაშვილის შესვლის სკანდალზე საუბრობს და აცხადებს, რომ უშიშროების საბჭოს ერთ-ერთ სხდომაზე დაწესებულებას საიდუმლო სტატუსი მოეხსნა.
,,არ ვეთანხმები სარეჟიმო წესის დარღვევის შესახებ გაკეთებულ განცხადებებს. ვნახოთ, რას იტყვის გამოძიება, არ შემიძლია მისამართების დასახელება იმ ობიექტების, რომელზეც საუბარია, მაგრამ ის ნამდვილად შემიძლია გითხრათ, რომ საიდუმლო ობიექტები იყო. ამის ძალიან მარტივი დადასტურება შემიძლია გითხრათ, ერთ-ერთი უშიშროების საბჭოში სხდომაზე ჩვენ მოვხსენით მას საიდუმლოს სტატუსი, ანუ მანამდე ის საიდუმლო დაწესებულება იყო, სხვანაირად ვერ მოვხსნიდით ამ სტატუსს'', - განაცხადა ხიდაშელმა.