„საქართველოს რკინიგზა“ მგზავრებს ორსართულიანი, ევროპული სტანდარტის შვეიცარული მატარებლებით მოემსახურება. მატარებელი დღეს "ბათუმი ცენტრალში" პირველად შემოვიდა. შვეიცარული ფირმა ”შთადლერის” მატარებელი ამჟამად ევროპის ქვეყნებში მოძრავი მატარებლების ანალოგია. ეს არის პირველი მატარებელი, რომელიც სრულად არის მორგებული შეზღუდული შესაძლებლობების მქონე პირების საჭიროებებზე.ერთი მატარებლით 450 მგზავრის გადაყვანაა შესაძლებელი.
ახალი მატარებლის შემოსვლის ოფიციალურ ცერემონიას "ბათუმი ცენტრალში" აჭარის ფინანსთა და ეკონომიკის მინისტრი რამაზ ბოლქვაძე, აჭარის ჯანმრთელობისა და სოციალური დაცვის მინისტრი ნუგზარ სურმანიძე, აჭარის განათლების ,კულტურისა და სპორტის მინისტრი გიორგი თავამაიშვილი,აჭარის უმაღლესი საბჭოს თავმჯდომარე ავთანდილ ბერიძე, ქალაქის მერი გიორგი ერმაკოვი და სხვა ოფიციალური პირები დაესწრნენ.
პირველ ეტაპზე კომპანიამ 2 ახალი ორსართულიანი მატარებელი შემოიყვანა. უახლოეს პერიოდში კი საქართველოში დამატებით 2 მატარებელი შემოვა. 1 მატარებლის შეძენა „საქართველოს რკინიგზას“ 9,950 მლნ ევრო დაუჯდა.
ახალი მატარებლების შემოყვანის მიუხედავად, მგზავრობის ფასის გადახედვა არ იგეგმება.”საქართველოს რკინიგზა”, ბილეთის სიიაფის მაჩვენებლით, მსოფლიოში მეორე ადგილზეა. ახალი მატარებლები ყველა საჭირო თანამედროვე მოწყობილობით, ულტრათანამედროვე ტიპის უსაფრთხოების სისტემებით არის აღჭურვილი.