დიდ ბრიტანეთში ჩატარებული რეფერენდუმის შედეგები ივლისში დაგეგმილ ნატო-ს სამიტზე გავლენას არ იქონიებს. ამის შესახებ ბრიუსელში ვიზიტით მყოფმა აშშ-ის სახელმწიფო მდივანმა ჯონ კერიმ ალიანსის გენერალურ მდივანთან იენს სტოლტენებრგთან შეხვედრის შემდეგ განაცხადა. ჯონ კერის თქმით თქმით, ნატო კიდევ უფრო გაძლიერდება და წინსვლას გააგრძელებს.
“ჩვენ 8-9 ივლისს დაგეგმილი ნატო-ს სამიტისგან დიდი მოლოდინები გვაქვს. ვფიქრობ, ევროკავშირის მონაწილეობა, დიდი ბრიტანეთის ჩართულობა ახლა ნატო-სთვის მნიშვნელოვანია, როგორც არასდროს. ჩვენ ველით, რომ ეს იქნება ნატო-ს ძლიერი შეხვედრა მნიშვნელოვანი გადაწყვეტილებებით, რომლებზეც რეფერენდუმი არანაირ შედეგს არ იქონიებს”, - განაცხადა ჯონ კერიმ.
თავის მხრივ, ჩრდილოატლანტიკური ალიანსის გენერალურმა მდივანმა განაცხადა, რომ დიდი ბრიტანეთის რეფერენდუმის შემდეგ ნატო-სა და ევროკავშირს შორის თანამშრომლობა კიდევ უფრო მნიშვნელოვანი გახდა.
“ნატო-ს სამიტი იქნება მნიშვნელოვანი პლატფორმა ალიანსის გასაძლიერებლად, განსაკუთრებით მას შემდეგ, რაც დიდმა ბრიტანეთმა ევროკავშირის დატოვება გადაწყვიტა. ვფიქრობ, ნატო კიდევ უფრო მნიშვნელოვანი პლატფორმა გახდა ევროკავშირსა და ჩრდილოეთ ამერიკას შორის თანამშრომლობისას, ასევე ევროპის ქვეყნებსა და ნატო-ს მოკავშირეებს შორის თავდაცვისა და უსაფრთხოების სფეროში თანამშრომლობისას. ნატო-სა და ევროკავშირს შორის პარტნიორობა ყოველთვის მნიშვნელოვანი იყო, თუმცა ახლა, დიდი ბრიტანეთის გადაწყვეტილების შემდეგ ის კიდევ უფრო მნიშვნელოვანი გახდა”, - განაცხადა იენს სტოლტენებერგმა.