ეროვნული ბანკის ვიცე-პრეზიდენტი არჩილ მესტვირიშვილი მოსახლეობას ურჩევს სესხი მხოლოდ ეროვნული ვალუტით აიღონ. მისივე თქმით, ასევე, უმჯობესია გრძელვადიანი დანაზოგი გახორციელდეს ეროვნული ვალუტით.
მესტვირიშვილმა ,,2030“ - თან საუბარში ასევე განაცხადა, რომ ეროვნული ბანკის მიზანი ფასების სტაბილურობაა და ,,გადაწყვეტილებებიც ამ ამოცანის შესრულებას ემსახურება”.
მესტვირიშვილის მტკიცებნით, საქართველოში ინფლაცია არის დაბალი, რაც მიუთითებს, რომ კურსს გრძელვადიან დინამიკაში გამყარების ტრენდი ექნება.
,,საქართველოში საგარეო სექტორის კორექციის გამო, ლარს გამყარების ტენდენცია აქვს, თუმცა ოპტიმისტური მოლოდინების გამო ლარი იმაზე მეტად იყო გამყარებული, ვიდრე იმ მომენტისათვის არსებული ფუნდამენტური ფაქტორები განაპირობებდა, რასაც ბუნებრივია, კორექცია მოყვა, - აღნიშნა არჩილ მესტვირიშვილმა.
როგორც მესტვირიშვილმა აღნიშნა, ეს სავალუტო ბაზრისთვის დამახასიათებელი მოვლენაა და გაცვლით კურსს წრფივი დინამიკა არასოდეს აქვს.
„დამატებით ბრიტანეთის რეფერენდუმის შედეგებმა საერთაშორისო ბაზრებზე გამოიწვია სავალუტო კურსების ცვლილება და მათ შორის მოლოდინების არხით გავლენა იქონია ლარის კურსზე. გასათვალისწინებელია, რომ მცურავი კურსის პირობებში კურსის გაუფასურებას აუცილებლად გამყარება მოყვება”, - განაცხადა მესტვირიშვილმა.
ამასთან, მესტვირიშვილის თქმით, ცენტრალური ბანკები, როგორც წესი, კურსის მოკლევადიან ცვლილებებზე კომენტარს არ აკეთებენ.
“ჩვენც ვცდილობთ, თავი შევიკავოთ, რათა არ გავაჩინოთ ბაზარზე გარკვეული მოლოდინები”, - აღნიშნა მესტვირიშვილმა.
მისივე თქმით, მოსახლეობის კეთილდღეობისა და დასაქმებისათვის მნიშვნელოვანია დაბალი ინფლაციისა და მდგრადი ეკონომიკური ზრდის კომბინაცია და არა ლარის გაცვლითი კურსის მოკლევადიანი დინამიკა.