საპარლამენტო უმრავლესობის წევრი თამაზ მეჭიაური თავისუფლების მოედანზე დამოუკიდებლობის დღესთან დაკავშირებით განლაგებულ, აშშ-ის შეიარაღებული ძალების სამხედრო ტექნიკასთან დაკავშირებით აცხადებს, რომ მათ მონაწილეობა უნდა მიეღოთ ცხინვალის რეგიონში მიმდინარე ბრძოლებში. მისი თქმით, მაშინ უფრო მისაღები იქნებოდა ამ ტექნიკის ყოფნა დღეს თავისუფლების მოედანზე.
"ამ საზეიმო დღეს უცხო ქვეყნის ტექნიკით ვიწონებთ თავს და თან ქვეყნის ნაწილი ოკუპირებული გვაქვს, ეს გარკვეულ სევდას ტოვებს ჩემში. ეს ტანკები თავის დროზე რომ მოსულიყვნენ, როცა გვიჭირდა ცხინვალის რეგიონში და იქ ბრძოლაში დაემტკიცებინათ მხარდაჭერა, გაცილებით მოტივირებული ვიქნებოდი, რომ ამ საზეიმო ღონისძიებაშიც მიეღოთ მონაწილეობა იქ ნაბრძოლ ტანკებს. მხოლოდ მოსაჩვენებლად არ უნდა იყვნენ, რომ ვითომ მხარში გვიდგას ვინმე და უძლეველები ვართ. მეორეს მხრივ, "სხვის" გასაღიზიანებლად, რომ შეიძლება, კიდევ პროვოცირებული იქნეს ახალი კონფლიქტი", - განაცხადა მეჭიაურმა.