,,თითოეულმა მოქალაქემ უნდა დაინახოს, რომ "თავისუფალ დემოკრატებს" ქვეყნის მართვა შეუძლიათ", - ამის შესახებ პარტიის ერთ-ერთმა ლიდერმა, ზურაბ აბაშიძემ თბილისის საქალაქო ორგანიზაციის კონფერენციაზე განაცხადა, სადაც იგი თბილისის ორგანიზაციის ხელმძღვანელად აირჩიეს.
მისი თქმით, ,,თავისუფალი დემოკრატები“ აუცილებლად დაბრუნდებიან ხელისუფლებაში.
,,ჩვენ გვაქვს ხელისუფლებაში ყოფნის გამოცდილება. ამავდროულად ვიცით, რა არის ოპოზიციაში ყოფნა. ეს კომფორტი არ არის. ეს არის პასუხისმგებლობა საზოგადოების წინაშე, რომ ჩვენ აუცილებლად დავბრუნდებით ხელისუფლებაში”, - აღნიშნა აბაშიძემ.
მისივე თქმით, 2016 წლის საპარლამენტო არჩევნები იქნება ბრძოლა დაპირებების შესრულებისთვის.
"2016 წლის არჩევნები პროგრამული არჩევნები იქნება. ეს კონკრეტულ გათვლებზე ორიენტირებული არჩევნები იქნება, სადაც თითოეულმა მოქალაქემ უნდა დაინახოს, რომ "თავისუფალ დემოკრატებს" ქვეყნის მართვა შეუძლია", - განაცხადა თავის გამოსვლაში ზურაბ აბაშიძემ.
