ნავთობისა და გაზის საერთაშორისო კორპორაცია დასაშლელია იგი ერთ დიდ კორუფციულ ბუდედ იქცა, - აცხადებს ”ჯი-ეიჩ-ენთან” საუბარში ეკონომიკური განვითარების ცენტრის თავმჯდომარე რომან გოცირიძე.
მისი თქმით, გაზისა და ნავთობის კორპორაციისა და რგინიგზის მიერ ბიუჯეტის გვერდის ავლით 102 მანქანის შეძენისა და სახელმწიფო უშიშროების სამსახურისათვის გადსცემის ფაქტი ავლენს მრავალ სერიოზულ პრობლემას.
”ჯერ ერთი, რატომ არ მოხდა მისი შესყიდვა ბიუჯეტიდან? იმიტომ რომ გაიზრდებოდა ბიუჯეტის ხარჯები და გამოიწვევდა სამართლიან კრიტიკას. დიდი ალბათობით, ეს თანხები სხვა მიმართულებით იქნებოდა გადამისამართებული. შეიძლება ეს პრობლემა წვრილმანად მოგვეჩვენოს იმასთან შედარებით, რაც ამ ფაქტით ინიღბება: ხდება საქართველოს კუთვნილი ასეულობით მილიონი ლარის ოდენობის შემოსავლების განიავება. ქვეყანა ბაქო-თბილისი ერზერუმის გაზსადენის მეშვეობით ღებულობს გაზს ტრანზიტის სანაცვლოდ. შემდეგ ხდება მისი გაყიდვა მომხმარებლებზე, ე. წ. მონეტიზაცია. სწორედ ეს ამონაგები იხარჯება უკონტროლოდ და არაეფექტიანად. მას აზის წურბელასავით სახელმწიფო ბიუროკრატია, თანამდებობის პირების სანათესაო, ხდება დაფარული სუბსიდირება გაზის მომხმარებლების და იქაც მსგავსი სქემების განხორციელება”,. - აცხადებს ”ჯი-ეიჩ-ენთან” საუბარში რომან გოცირიძე და აღნიშნავს, რომ მონეტიზაციით მიღებული თანხებით ხდება გაზის ტრანსპორტირებისა და რეალიზაციის დანახარჯების ანაზღაურება, რომელიც ასევე უზომოდ გაბერილია და ესეც ენერგეტიკის სამინისტროს მიერ შერჩეული ადამიანების თბილად მოკალათების მექანიზმია.
”მოკლედ, ეს არის ერთი დიდი კორუფციული სისტემა, რომელიც არის ძირფესვიანად დასაშლელი. რაც შეეხება მანქანების თემას, იგი ასევე ავლენს სახელმწიფო რესურსების ყველაზე არარაციონალურად და არაზნეობრივად გამოყენების სხვა ფაქტებსაც. ამას შემდეგი სტატისტიკაც კარგად ადასტურებს: საქართველოში 2014 წელს შემოვიდა 715,1 მილიონი დოლარის ღირებულების მსუბუქი ავტომებილი და გავიდა 517,8 მილიონი დოლარის ღირებულების, ანუ ქვეყანაში დარჩა 197,3 მილიონი დოლარის ღირებულების მსუბუქი ავტომობილი. გასულ, 2015 წელს კი შემოვიდა 461,3 მილიონი დოლარის ღირებულების და გავიდა 179,6 მილიონი დოლარის ღირებულების, ანუ ქვეყანაში დარჩა 281, 7 მილიონი დოლარის ღირებულების მსუბუქი ავტომობილი. როგორც ვხედავთ, შარშან საქართველოში 84,4 მილიონი დოლარით მეტი მსუბუქი ავტომობილი გაიყიდა, ვიდრე 2014 წელს. რა დასკვნა შეიძლება გამოვიტანოთ აქედან? განა სავალუტო კრიზისში მყოფ ქვეყანაში მსუბუქი ავტომობილების ადგილზე რელიზების ამ მოცულობით მატება შესაძლებელი იქნებოდა კერძო სექტორის მეშვეობით? რა თქმა უნდა არა. მათი ძირითადი შემსყიდველი სახელმწიფო სექტორი იყო: სამინისტროები ( მხოლოდ იბიარდის ღონისძიებისა და სუსისათვის 167 ახალი ავტომობილი იქნა შეძენილი), პარლამენტი, თბილისის მერია და მისი სამსახურები, მმართველობისა და თვითმმართველობის ორგანოები, სხვა სახელმწიფო დაწესებულებები ( საჯარო სამართლის იურიდიული პირები) და სახელმწიფოს მიერ დაფუძნებული არაკომერციული იურიდიული პირები, სახელმწიფო საწარმოები( რკინიგზა, ნავთობის კორპორაცია და მსგავსი სხვა ორგანიზაციები) და ასე შემდეგ. ეს მრავალი ათეული მილიონი ლარი დახარჯულია არა მანქანებზე, როგორ წარმოების საშუალებებზე, არამედ მსუბუქ ავტომობილებზე, როგორც ფუფუნების საგნებზე. მერე გაკვირვებით კითხულობენ, თუ რატომ გაედინება ქვეყნიდან ფული, თუ რატომ ეცემა ლარი! კორუფცია არ არის მხოლოდ პარვა და მექრთამეობა. ეს ზოგადად სახელმწიფო მასშტაბის უკანონობასაც და დაუსჯელობასაც გულისხმობს. კორუფცია საჯარო საკუთრების არადანიშნულებისამებრ გამოყენებაცაა. ჯიპების და პრემიების გახმაურებული ამბები ზედაპირზე დევს და ადვილად შესამჩნევია. უფრო მასშტაბური სახელმწიფო ტენდერებისა და სახალხო სიმდიდრის განიავების ის ფაქტებია, თუნდაც გაზის საკითხის მსგავსი, რომელიც მრავალი პლასტითაა შენიღბული და რომლის გამომზეურებასაც ასე უფრთხიან”, - ამბობს რომან გოცირიძე.