შს სამინისტროს შიდა ქართლის სამხარეო სამმართველოს უფროსის ვლადიმერ ჯუღელის განცხადებით, ცხინვალის სეპარატისტული რეჟიმთან ქართველების განთავისუფლებისთვის გაცვლა არ მომხდარა.
როგორც "ჯი-ეიჩ-ენს" ჯუღელმა განუცხადა, ამ დროისთვის ქართულ მხარეს დაკავებული არავინ არ ჰყავს, შესაბამისად, ქართველებში ვინმეს გაცვლა შეუძლებელი იქნებოდა.
მისვე თქმით, სეპარატისტების ტყვეობიდან განთავისუფლებულ ქართველებს გორის სამხარეო პოლიციის სამმართველოში გადაიყვანენ, დაკითხვის შემდეგ კი ისინი საკუთარ სახლებს დაუბრუნდებიან.
ცხინვალის სეპარატისტულმა ხელისუფლებამ უკანონოდ დაკავებული კიდევ სამი ქართველი გაანთავისუფლა. ამის შესახებ სააგენტო "რესი" ცხინვალის სეპარატისტული რეჟიმის ე.წ. სახალხო დამცველზე დავით სანაკოევზე დაყრდნობით იუწყება.
"1986 წელს დაბადებული ლევან ბიგანაშვილი, 1974 წელს დაკავებული მერაბ თვაური და 1986 წელს დაბადებული ალექს დიდებაშვილი ევროკავშირის დამკვირვებლებს საზღვარზე გადავეცით. ყველა მათგანი კასპის რაიონის სოფელ თვაურების მცხოვრებია", - განაცხადა სანაკოევმა.
შეგახსენებთ, რომ კასპის რაიონის სოფელ თვაურებში მცხოვრები 6 პირი ახალგორის რაიონში საზღვრის უკანონო დაკავების და ხე-ტყის უკანონო ჭრის ბრალდებით 2009 წლის 4 სექტემბერს დააკავეს.
2 მაისს ევროსაბჭოს კომისარმა ადამიანის უფლებათა დაცვის საკითხებში თომას ჰამერბერგის ცხინვალში ვიზიტს დროს სეპარატისტებმა 3 დაკავებული გამოუშვეს.