ფრაქცია „ქართული ოცნების“ წევრი ლუკა კურტანიძე თანაფრაქციელ ზაქარია ქუცნაშვილს უპირისპირდება.
დღევანდელ პლენარულ სხდომაზე, კურტანიძე ერთ-ერთ გაზეთში ზაქარია ქუცნაშვილის მიერ გამოქვეყნებულ ინტერვიუს გამოეხმაურა, სადაც ის პრემიების აკრძალვის თაობაზე პარლამენტში ჩავარდნილ კანონპროექტზე საუბრობდა.
კურტანიძე ქუცნაშვილს ურჩევს, საკუთარ თანაგუნდელებს ნუ გააკრიტიკებს და პრობლემებზე გუნდის შიგნით ისაუბროს.
„ზაქარია ქუცნაშვილის ინიციატივას ვეთანხმები, რადგან ამ მხრივ, ბევრი საკითხი მოსაწესრიგებელი და დასარეგულირებელია, მაგრამ ქუცნაშვილი თანაგუნდელებს მასმედიით ესაუბრება და პარლამენტარების ავ-კარგიანობაზე ლაპარაკობს. ქუცნაშვილს შევახსენებ, რომ ერთი გუნდი ვართ და სამშობლოს გადასარჩენად ერთი გული დავდეთ. ვფიქრობ, რომ ყველა მნიშვნელოვანი საკითხი კომუნიკაციის გზით გუნდის შიგნით უნდა განიხილებოდეს და სააშკარაოდ მერე უნდა გამოვიტანოთ. ბატონო ზაქარია, თქვენი ინტერვიუ შეურაცხმყოფელი და დამამცირებელია გუნდის წევრების მიმართ. ჩვენი გუნდი სამშობლოს გადასარჩენად გაერთიანდა და არა - ხელფასისა და სხვა პრივილეგიისთვის. ეს საკითხი შეიძლებოდა რამდენიმე წლის წინ გაგხსენებოდათ და არა - რამდენიმე თვით ადრე, არჩევნებამდე. ნუ ეძებთ უკეთესს, რადგან ამ გუნდმა მოგიყვანათ იქ, სადაც ხართ და მათზე უკეთესს ვერ იპოვით, რადგან აქ ყველა თავის საქმის უმაღლესი პროფესიონალია და ბრძოლს დროს ყველა უღალატოა. შესაძლებელია, საკუთარ შეფასებაში მკაცრი ვარ, მაგრამ როცა საქმე თანამებრძოლების ღირსებას ეხება, შესაძლებელია უფრო მკაცრიც ვიყო. ქართული ანდაზა მახსენდება - „დედის წინ მორბენალი კვიცი, მგელმა შეჭამაო“. გთხოვთ, თანამებრძოლებს გაუფრთხილდით“, - მიმართა ქუცნაშვილს კურტანიძემ.
გასულ კვირას, პარლამენტმა ქუცნაშვილის საკანომდებლო ინიციატივა ჩააგდო, რომელიც 1-ელ იანვრამდე საჯარო სამსახურში პრემიების გაცემას ეხებოდა.