ცესკო შუალედური არჩევნებისთვის სრულ მზადყოფნას გამოთქვამს, - ამის შესახებ ცესკოს მიერ გავრცელებულ განცხადებაშია ნათქვამი.

,,31 აგვისტოს, ცენტრალურმა საარჩევნო კომისიამ  საქართველოს პარლამენტის და საკრებულოს შუალედური არჩევნები დანიშნა. პარლამენტის შუალედური არჩევნები მაჟორიტარული საარჩევნო სისტემით, #11 საგარეჯოს და #65 მარტვილის ოლქებში ჩატარდება, ხოლო ადგილობრივი თვითმმართველობის წარმომადგენლობითი ორგანოს, საკრებულოს შუალედური არჩევნები  დმანისის,  ვანის,  ხობის და საგარეჯოს ადგილობრივ საარჩევნო ოლქებში.   

არჩევნები მიმდინარე წლის 31 ოქტომბერს გაიმართება.

როგორც დღეს, ცესკოში გამართულ საინფორმაციო ბრიფინგზე ცესკოს სპიკერმა ანა მიქელაძემ აღნიშნა, - ცესკომ, დამკვიდრებული პრაქტიკის მიხედვით, მიიღო დადგენილება, რომელიც  კონკურენტული და თანაბარი საარჩევნო გარემოს შექმნას შეუწყობს ხელს: დადგენილების მიხედვით, პოლიტიკურ პარტიებს, რომლებიც არ იყვნენ რეგისტრირებული 2012 წლის 1 ოქტომბრის საპარლამენტო არჩევნებისთვის, კანონით განსაზღვრული წესის დაცვის შემთხვევაში, საშუალება ექნებათ მონაწილეობა მიიღონ 31 ოქტომბრის შუალედურ არჩევნებში.

საგარეჯოში არჩევნები 49 უბანზე ჩატარდება, სადაც 46 011 ამომრჩეველი ფიქსირდება, ხოლო მარტვილში - 39 უბანზე, სადაც 33 465 ამომრჩეველია. რაც შეეხება საკრებულოს შუალედურ არჩევნებს, დმანისის 4 საარჩევნო უბანზე 1623 ამომრჩეველია რეგისტრირებული, ზედა ვანის ერთ უბანზე - 808, ხობის საარჩევნო უბანზე - 822, ხოლო საგარეჯოში - 1533.  

საარჩევნო ადმინისტრაცია სრულ მზადყოფნაშია არჩევნების პროფესიულ დონეზე ორგანიზებისა და ყველასთვის ხელმისაწვდომ გარემოში ჩასატარებლად.

* * *

შეგახსენებთ, რომ შუალედური არჩევნების ჩატარების საფუძველი გახდა, საპარლამენტო არჩევნების შემთხვევაში საგარეჯოს მაჟორიტარი დეპუტატის ქალბატონი თინათინ ხიდაშელის თავდაცვის მინისტრის პოსტზე დანიშვნა, ხოლო მარტვილის მაჟორიტარი დეპუტატი, ბატონი ნაული ჯანაშია გარდაიცვალა.

საკრებულოს შუალედური არჩევნების დანიშვნა ოთხივე ადგილობრივ საარჩევნო ოლქში მოხდა საკრებულოს მაჟორიტარი დეპუტატებისთვის უფლებამოსილების ვადამდე შეწყვეტის გამო. ამათგან ერთ ადგილობრივ საარჩევნო ოლქში, კონკრეტულად კი დიდ დმანისში,  საკრებულოს მაჟორიტარი დეპუტატის გარდაცვალების გამო,” - ნათქვამია განცხადებაში.