საფრანგეთის ელჩი უნგრეთის საგარეო საქმეთა სამინისტროში განმარტებებისთვის დაიბარეს. ამის მიზეზი საფრანგეთის პირველი დიპლომატის მიერ გაკეთებული განცხადება გახდა. ლორან ფაბიუსმა ღიად განაცხადა, რომ ბუდაპეშტის მიერ სერბეთის საზღვართან დამცავი კედლის მშენებლობა ევროპული ღირებულებების შელახვაა და რომ მსგავსი კედლები ცხოველებისგან თავის დასაცავადაც აღარ უნდა შენდებოდეს. ფაბიუსის მწვავე კრიტიკას მისი უნგრელი კოლეგის მხრიდან რეაგირება უკვე მოჰყვა. პეტერ სიიარტომ ფრანგი კოლეგის განცხადებას უსაფუძვლო და შოკისმომგვრელი უწოდა. მისივე თქმით, ევროპის ქვეყნებმა მიგრაციის პრობლემის დასაძლევად ერთად უნდა იმუშაონ და ერთმანეთის კრიტიკით არ უნდა იყვნენ დაკავებული.