,,თავისუფალი დემოკრატების” ერთ-ერთი ლიდერი ირაკლი ჩიქოვანი აცხადებს, რომ საგარეჯოში ,,ქართული ოცნების” მაჟორიტარობის კანდიდატს თამარ ხიდაშელს არსებული ხელისუფლების პირობებში საკუთარი პრინციპების გატარება გაუჭირდება. ამის შესახებ, ჩიქოვანმა ,,ჯი-ეიჩ-ენთან ”საუბარში განაცხადა და აღნიშნა, რომ მმართველმა ძალამ 2012 წელს გაცემულ ყველა დანაპირებას გადაუხვია.
,,რაც შეეხება კანდიდატების კომპეტენტურობას, საერთო კონტექსტში ვერ შევაფასებ. შევაფასებ თამარ ხიდაშელს, რომელსაც ვიცნობ საიას-ს ხელმძღვანელობიდან. მისი ხელმძღვანელობის პირობებში საკმაოდ აქტიური და მნიშვნელოვანი პროგრესი ჰქონდა საიას. იმედს ვიტოვებ, რომ ,,ქართული ოცნების” პირობებში ქალბატონი თამარ ხიდაშელი შეძლებს საკუთარი პრინციპების გატარებას, თუმცა ეს ძალიან გაუჭირდება, რადგან ,,ქართულმა ოცნებამ” ყველა დანაპირებს გადაუხვია, რომელიც 2012 წელს გვქონდა”, _განაცხადა ჩიქოვანმა.
კითხვაზე, როგორ წარმოუდგენია შუალედური არჩევნების გამართვა, როცა თითქმის ყველა პარტია მას ბოიკოტს უცხადებს, დეპუტატი განმარტავს:
,,თავისუფალი დემოკრატები” შუალედურ არჩევნებში მონაწილეობას არ ვიღებთ. ეს არჩევნები გაგრძელებაა იმ მანკიერი პრაქტიკისა, რომელიც მაჟორიტარული ოლქების სახით ქვეყანაში არსებობს. დარწმუნებული ვარ, ხელისუფლება იპოვის სხვადასხვა პარტიებს, რომელიც შუალედურ არჩევნებში მიიღებენ მონაწილეობას. თუმცა, პრაქტიკულად ყველა პოლიტიკური ძალა ამ არჩევნებში არ მონაწილეობს”, _განაცხადა ,,ჯი-ეიჩ-ენთან” საუბარში ჩიქოვანმა.
შეგახსენებთ, რომ პრემიერ-მინისტრმა ირაკლი ღარიბაშვილმა მარტვილსა და საგარეჯოში დაგეგმილ შუალედური არჩევნებისთვის ,,ქართული ოცნების” კანდიდატები დაასახელა. კერძოდ, მარტვილში ,,ქართული ოცნების” კანდიდატი სოსო დანელია იქნება, საგარეჯოში კი თამარ ხიდაშელი.
